By Van Biak Thang — Kum thum chung Chinram chungah chaklei bik Tonzang peng in thlanglei bik Paletwa peng tiang rian kan tuan. Kanpetlet, Mindat le Matupi peng kan kal tikah thil aa phun dang ngaimi kan hmuh. Cucu zeidang si loin holh kong a si.

COVID-19 kong he pehtlai in siseh, a dangdang cawlcanghnak kongkau ah siseh, cazual chuah ding le chimrel ding a um ahcun kan unau hna nih an chim a tam cemmi cu, “Kawl holh hman ah a tha bik,” ti hi a si.

“Kanmah holh cio in kan tial ahcun a rel khomi zong an tlawm tuk cang i a buai tuk fawn. Chuah phu a si lo. Kawl holh kha an theih dih ko,” tiah an kan chimh.

Photo credit: Khui Shing (Facebook)

Kokek miphun sining in ka van zoh tikah holh le ca kan ngeihmi, kan miphun sinak hmelchunhnak kha a zor thluahmah ko ti kha fiang tein a lang. Mah holh tein kan leh lai i kanmah ca in kan rel lai timi lungput nakin mi tam deuh nih kan fiang ko timi lungput kan lungthin ah a rak luh tuk cangnak kha a lang.

Cucu aho palh a si lo, a chimtu zong mawh phurhter a si lo. Kokek miphun pakhat kan sinak a muru, a hrim le a hrampi a feh ti lonak ka chim duhmi a si. A fil cangnak ka chim duh.

Kawl holh hi kan thiam a herh bak. Thiam phu zong a si i thiam ding zong kan si. Nain, kanmah kokek holh le ca kha hloh in Kawl holh kha kan chilhter ding a si maw ti kha a ka ruahter ngaingai.

COVID-19 kong he pehtlai in ralrinnak kongkau caih dingah meting kan thu hna i kan zapi tein kan i fian i kan i ralrin khawhnak ding caahcun kanmah kokeh holh in kan rel, kan theih a herh tiah kan chim hna. Nain, ‘Kawl holh a tha bik ko,” tiah a chimtu lila kha kanmah Chinmi kan si. Tuchun kan nikhua ahcun a tha bik a si tak ko men lai nain kan miphun caah a tha bik a si hnga dek maw?

About The Author

Na ruahning rak langhter ve.. (Leave a comment)

%d bloggers like this: