Hnaring Certual Chung Zung Sakmi Vote Laaknak In Biakhiahnak An Tuah Than Lai

0

Salai CungCung|2019 July 23| Thantlang peng Hnaring khua certual chung i cozah zung sakmi le motor lam nih tan ding in cozah lei nih timhtuahnak an ngeihmi cu Hnaring khuami nih duh lonak lam an zawh hnu July 22 ah Khuami nih Chin ramkulh cozah ton biaruahnak an ngeih i pehzulh in sak le sak lo ding vote laaknak in biakhiahnak an tuah than lai tiah kan theih.

“Hi kan khua chung certual cu hlan lio  pupa chan in rak ngeih cangmi a si. Hnaring hi sang pahnih in kan um, sangkhatnak khuabawi cu Pu Za Khuai, sang hnihnak khuabawi Pu Tha Cung le a dang dang minung 15 an i ton hnu ah zapi hnatlaknak telh lo in anmah minung 15 nih zapi hnatlaknak a si ko tiin cozah sin ah ca an pek hna i certual ah zung sa ko u an ti hna. Certual ah zung saknak ding hmunhma pawl an cawh tikah khuami nih an siang ti lo. Hlan lio cozah kan khua an rak tlun lio ah zung saknak hmun an zoh cia mi ah khan sa ko hna seh, hika ah cun kan siang lo an ti. Cu tikah sangkhat ah minung 15 kha meeting an auh than hna. Cu meeting ah mipi nih certual ah zung hi an duh lo caah khuami zapi meeting auh ding an si. Khuami zapi hnatlaknak an ngeih ah cun sa ko hna seh, an duh lo ah cun hmundang ah sa hna seh tiin meeting kaimi nih an chim. Asinain upa pawl nih mizapi meeting auh ding cu a si kho lai lo, upa pawl nih sak ding in kan chim cang mi cu sa ko hna seh an ti caah inn satu pawl zong nih peh zulh in an sak caah khua mi zapi nih July 14 ah duh lonak langhternak lam zawhnak kan tuah. Cu hnu ah zarkhat kan hngah hna i inn satu nih peh zulh in an sak rih ko caah tubantuk in kan si ning pawl chim ding ah Chin ramkulh cozah pawl kan rak ton hna hi a si” tiah Hnaring khuami Pu  Hre Hmung nih TCP ah a chim.

“ Kanmah nih cun Hnaring khuami zapi meeting auh ding cu kan si kho lai lo kan ti caah Chin ramkulh cozah lei nih tuanvo ngeitu minung pahnih Hnaring ah kal ding in timhtuahnak kan rak in ngeihpiak hna lai a kan ti. Cu ti Hnaring ah meeting kan va ngei lai i certual chung ah zung saknak kong vote laknak kan va ngei lai. Cu vote nih a tei ning in kan kal te ko lai. Sak lonak vote nih a tei i pehzulh in an sak rih ko ah cun Hakha khua chung tiang hmanh duh lonak langhter ding ah saduhthahnak kan ngei” tiah Pu Hre Hmung nih a chim chap.

Tutan Hnaring khuami nih Chin ramkulh cozah an va ton hna nak ah Chin ramkulh cozah lei nih an rak lehmi hna cu, khua mi zapi meeting tuah in zapi hnatlaknak he tuah ding in an chimh hna tiah kan theih.

Hnaring khua certual ah cozah zung saknak kong le sianginn kam motor lam tannak kong he pehtlai in khuami hna nih July 14 chung suimilam 12 :30 ah zapi tonnak ngeih hnu ah suimilam 1:30 in duhlonak lamzawhnak cu an tuah. Pehzulh in rian an tuan rih ko caah tubantuk in Hakha ah Chin ramkulh  minister tonnak an rak ngeih hi a si tiah kan theih.

About The Author

Na ruahning rak langhter ve.. (Leave a comment)

%d bloggers like this: