Hnaring Khua Ti An Har Caah Inn Ah Thilsu Ngam Lo In Bawinu Tiva Ah An Suk
Hnaring Myo pekmi hunnak tuah lio
Salai Elvis| 2018 April 30| Thantlang peng Hnaring khua cu ti an har caah inn cia ti ah thilsuk ngam lo in an khua taw Bawinu tiva khan 2 tluk aa hlat nak ah thil an su hna tiah thawng kan theih.
Hanringkhua cu khuapi pakhat a si i dinti an lak mi an i zat lo caah a tu bantuk in khuami cheukhat dinti i zat lo ruangah harnak an ton hi a si.
“KBZ Bank nih ti phurhnak motor pakhat an kan hlut mi in ti a har mi poah nih pipa pakhat caah 1000 an thawh i ti cu Bawinu tiva ah than in thenphawt an si. Inn khat nih pipa pakhat ah 1000MMK lengmang thawh a si tikah micheu cu tangka thawh pengawk an ngeih lo caan ah tikhur ah an va than tawn. Micheu cu thilsuknak caah tiin pipa 10 hna an cawk i inn ah thil an su kho ve, si nain mitam u cu Bawinu tiva ah thil suk a si ko” tiah Hanring khuabawi hlun Pu Bawi Hre nih TCP ah a chim.
Inn khat nih pipa pakhat man 1000MMK an thawhmi cu an herh zat in pipa cu cawk a si. Hi tangka in Diesel (alh hang) man le motor mawngtu pa retheih man hlawh pek chih a si tiah theih a si.
“Khua mi nih dinti kan lak nak hi khan 15 aa hlatnak hmun ah a si i ti kan laknak a kum zong sau tuk pinah tipep an thing cang i lam cenceo ah aa rawk leng mang caah duh ning in ti a chuak lo. Zarhkhat ah voihnih lawng hna a ra i cu hmanh cu inn khat nih tithol (pung) hnih hlei kan ting lo. Micheu cu a ting bak lo mi zong an um. KBZ tiphurhnak motor in inn khat nih pipa pakhat 1000MMK thawh mi tein a mawng tu hi nikhat ah 7,000 pek a si. Kan herh caan paoh ah kan hman ko” tiah Pu Bawi Hre nih a chim.
KBZ nih ti phurhnak motor a hlut mi hna cu Febuary 5 khuapi sinak hunnak tuah lio ah bawmhnak an pek hna a si. Hnaring khua cu inn 500 reng lo le minung 2000 renglo an um tiah theih a si.+++
About The Author
