Hnaring Khuapi Caah KBZ Bank Nih Tiphurhnak Motor An Hlut Hna

0

Salai Elvis| 2018 February 6| Thantlang peng Hnaring Khuapi cu KBZ Bank nih tiphurhnak motor pakhat an hlut hna tiah theih a si.

February 5 Hnaring khuapi hunnak tuah ni ah atu bantuk in KBZ Bank nih ti phurhnak Mortor laksawng an pek hna hi a si.

“Ti phurhnak motor an kan bawmhmi hi kanmah khua nih kan sokmi a si lo. Anmah lungtho tein laksawng ah an kan pekmi a si. Hi motor cu ti phurhnak ah hman a si ko lai. A tu lio ah ti kan i za bak lo, a caan te ah tiphurhnak motor an kan bawmh cu khuami kan i lawm tuk. Kan khua hi hlan lio ah UNICEF nih ti an kan bawmhmi a um ko nain a tu cu inn kan karh tuk caah kan i za ti lo. Khuami thazaang in ti lak kan timh ko nain ti pape cawknak kan i harh deuh fawn. Hi motor an kan bawmh hin cun tampi thathnemnak an kan pek cang lai. Bawinu tiva le kadang ah ti thannak tampi a um ko” tiah Hnaring khua tuanvo ngeitu Pu Hre Ling nih The Chinland Post ah a chim.

KBZ Bank nih Thantlang khua caah ti phurhnak motor pahnih bawmhnak a pek bal ve cang hna i a tubantuk in Hnaring khuapi ca zong ah bawmhnak a pek than hi a si. Hnaring khua cu inn 450 le minung 2,000 renglo an umnak khua a si tiah kan theih. +++

About The Author

Na ruahning rak langhter ve.. (Leave a comment)

%d bloggers like this: