Hngakchia 5 million telh in Myanmar mipi 14.4 million nih bawmhnak an herh : UNICEF

The Chinland Post | 2022 June 9 – Hramhram in uknak lak a si hnu ah hngakchia 5 million telh in Myanmar mipi 14.4 million nih bawmhnak an herh tiah UNICEF nih a thanh.

Rampi harnak telh in buainak, hramhram thiltuahnak, Covid-19 zawtnak, sifahnak karh chinnak le mipi pekchannak hna a zor dih caah Myanmar ram ah ton bel a si lomi bawmhherhnak le nuhrin covo ngeih lonak pawl ton a si tiah an langhter.

Cubantuk buainak le harnak ruangah Myanmar ram pumpi ah a ummi hngakchia pawl nunnak, ṭhanchonak le nuamhnak hna a ṭhihphaih i Rohingya pawl himnak, limhang ngei tein an umnak hmun an kir khawhnak hnga caah Rakhine ram dirhmun a zualter chin tiah UNICEF nih a ruahdamh.

Myanmar ram hngakchia 1 million hi Covid khamhnak sii aa chun rih lomi an si i 2021 thlathok hrawng in hngakchia 3 million cu a himmi ti bawmhnak an ngah ti lo.

Cun hngakchia 12 million leng nih kumkhat leng ṭha tein ca an cawn kho ti lo.

UNICEF bawmhnak a kalning hi minung nunnak a khamh khomi bawmhnak, a biapi mi thiltuahpiaknak dirter lo le hmunhma kip rianṭuannak a tha ṭhawn khawhnak caah hmailei caan saupi ca tiang tawlrelnak ṭhatter chin ding in papek le tawlrel a si tiah a chim.

2022 caah Myanmar ram a ummi hngakchia hna a lamkip an herhmi tawlrelnak caah USD $ 151.4 million a herh tiah UNICEF nih a thanh.

Na ruahning rak langhter ve.. (Leave a comment)

%d bloggers like this: