Hniarlawn Khuami Nih An Ram Kong Ah Duhlonak Lamzawh An Timh

Salai Elvis| 2019 January 24| Hakha peng Hniarlawn khua cu Hakha khuachung Sipin Area ah chiah dingin khuami hnatlaknak tel lo in an ram an chuh hna caah a tu bantuk in duhlonak lamzawh an timh hi a si.

NLD cozah a kai hram thok tein Hniarlawn khua cu Hakha khuachung Sipin Area ah chiah dingin tuanvo ngeitu hna nih an rak len kai ko hna nain khuami nih an rak duh lo. Khuami duh lo bu in a tu lio ah an ram chung cheukhat cu Hakha khua chung siding in an kauhmi cung ah an lungtlinlonak hi a si.

“Hniarlawn khua cu kan ramchung cheuthum ah cheukhat cu Hakha sipin Area chungah nan chiah. Kan ngaihchiatnak cu uktu ngei lo bantuk in ca zong kan tial cang. Tiphul lam ah phunninglo (cu-caw) anmah duh ning in an um, dum le lo an kan tuah hnawh. Ca zong voili tiang kan tial cang nain tuni tiang ah cozah, a kan hruaitu lei nih biaceihpiak a um lomi hi kan khuaruah a har. Kan lungrethei, kan ngaih a chiatuk. Cucaah, duhlonak lamzawh dingin cunglei ah ca tial kan i tim. Cucaah cun Chief Minister le Hluttaw Speaker nih tuni ka chimmi hi rak kan tawlrelpiak hram u law tiah Pathian min in nan hmai ah ka chim” tiah Hniarlawn khuabawi Pu Phir Mawng nih Chin ramkulh cozah hna hmai ah a chim.

“Kan khua lawng an nganh i a cunglei khi Hakha khua sipin Area chungah an chiah. Cucaah, duh lonak lam zawh kan i tim. Lamzawh ni caan tu cu a fiang rih lo. Zapi theih awk in Media sin ah thawng kan rak thanh than te lai. Cozah zung zong ah ca kan chiah rih lo, kan i timh lio pi lawng a si rih. An kan remhpiak lo a si cun duhlonak kan langhter ko lai. Khuami hna le tuanvo ngeitu hnatlaknak kan ngei cang” tiah Pu Phir Mawng nih The Chinland Post ah a chim.

Hniarlawn khua hi inn 180 le minung 700 hrawng um mi khua an si i phungning lo in an ram chungah dum le lo tuah in a um mi le deu a sa mi 90 tluk an si cang tiah kan theih. +++

Photo: Salai Tialbawi Ling fb