Homalin kahdohnak ah SAC ralkap 30 leng an thi, hriam cheukhat zong an lak khawh
The Chinland Post | 2022 November 24 – Sagaing ramṭhen, Homalin peng, Pinkout khuate ah SAC ralkap le SNA phufonh hna cu November 11 thok in an rak luh caah mipi hriamtlai phu pawl he voi 3 tiang kahdohnak a chuak.
Kahdohnak chung ah SAC ralkap 30 leng an thi i PDF pawl nih Nannaymay palek sakhaan an lak khawh leng ah hriam tampi an lak khawh tiah PDF phu pawl nih an thanh.
Homalin PDF rianngeitu nih” Pinkout kahdohnak ah SAC ralkap 30 leng an thi, Nannaymay palek sakhaan kahdohnak ah SAC ralkap ruak 2 kan hmuh. Paritphanaing Mission ah SAC ralkap 7 an thi. Kahdohnak pawl chung ah hriam cheukhat kan lak khawh” tiah DVB ah a chim.
SNA pawl cu kah kan duh hna lo caah SAC ralkap pawl lawng kan i tinh hna tiah a chim.
Kahdohnak chung ah SAC ralkap nih an kah mi hriamngan ruang ah Pinkout khua mipi inn 2 a rawk i mizaw phor mawṭaw 1 a rawk. Kum 50 nu pakhat zong a thintur a dai i a thi tiah Homalin PDF nih an thanh.
About The Author
