Homalin Le Paungbyin Ah Nithum Chung Kahdohnak Pehzulh In A Chuak, SAC Ralkap 20 Nak Tlawm Lo An Thi
The Chinland Post | 2023 June 6 — Sagaing ramṭhen, Homalin peng le Paungbyin peng ramri ah a cang mi ni 3 chung kahdohnak ah SAC ralkap 20 nak tlawm lo an thi i hriam zong an lak khawh tiah HPDF 124 nih a thanh.
June 2 in June 4 tiang Paungbyin peng, Satdaw khuate pawng ah a rak lut mi SAC ralkap lei phufonh pawl cu mipi hriamtlai phufonh pawl nih an kah hna i SAC ralkap 20 nak tlawm lo an thi, hriam zong an lak khawh tiah an langhter.
June 2 zinglei sml 10:00am hrawng ah thazang 200 leng SAC ralkap Infantry 272, Infantry 222, LIB 370 le SNA Brigade 891, Brigade 753, Pyusawhtee hna phufonh hna cu Satdaw khuate lei ah an rak luh caah mipi hriamtlai pawl nih an kah hna hi a si i kahdohnak chung ah SAC ralkap 20 nak tlawm lo an thi, 60MM telh in hriamngan, hriamhme le kuanzen hna an lak khawh tiah theih a si.
June 3 zaanlei sml 3:40pm hrawng ah SAC nih Mi 17 Helicopter 1, Mi 35 Helicopter 1 in bom a rak thlak, June 4 chun sml 1:00pm hrawng zong ah Homalin peng, Kyunkone khua in Satdaw khua lei ah SAC phu pawl an kir ṭhan tiah theih a si.
Kahdohnak chung ah Paungbyin-Homalin PDF fonh, Paungbyin mipi runventu phu hna bawm in an doh hna hi a si i ni 3 chung kahdohnak ah mipi hriamtlai 1 a nunnak a liam tiah theih a si.
About The Author
