Hong Kong Khuapi Buainak Nih Tuluk Le Hong Kong Khuahlum Kar Buainak A Chuahpi

The Chinland Post – Online |2019 November 19|  Ni 130 leng a buai cangmi Hong Kong khuapi cu tuni tiang daih lei nakin nikhat hnu nikhat zual lei a panh chin lengmang. Lamzawh in duhlonak langhtertu nih an halmi phun (5) chung in phun khat lawng tlinter a si rih caah, zapi thinhunnak cu a zual chin lengmang. Thin hun tuk lungsivang in Hong Kong khuapi ah a ummi Tuluk pawl cu khuachung minung hna nih hmuitinh in ral ah an ser hna.

Duhlonak langhter caan paoh ah Tuluk lei nih ngeihmi Bank le dawr pawl hna cu lung in cheh piak in an hrawh piak peng hna. Cucaah, Tuluk lei company tampi cu khar an si i khuachung zong an chuahtak len cang hna.

Hong Kong ah ummi Bank of China cu duhlonak langhtertu nih an hrawhpiak hna

Tukum October thla lio khan Tuluk ram cozah nih ngeihmi Media CCTV ah President Xi Jingping nih cun “Mizei an si ah Tuluk ram rawhnak chuahter a timtu paoh cu an pumsa hrawh dih i an ruh vialte zong leiphut ah kan canter dih hna lai” tiah fak nawn in a rak chim. Xi Jingping nih hiti a chim lioah hin khuazei mi le khawika minung cu a chim lo nain atu lio ah Tuluk cozah a doh cemtu cu Hong Kong minung an si.

Tuluk President Xi Jingping

Hong Kong Free Press nih cithlatnak a tuahmi ah Hong Kong khuapi sianghleiruun a kaimi siangngakchia hna chung in zatuak 76% cu Tuluk lei in a van kaimi an si. November 12 ni khan duhlonak a langhtertu hna nih cun sianginn pawngkam deuh ah i hmuitinh in buainak an chuahpi. Sianghleiruun tampi cu lakhruak in khar an si cang i Tuluk lei in a rak kaimi siangngakchia tampi zong nih Hong Kong an chuahtak. Cheukhat sianghleiruun cu Online in cacawn mi zong an um i a cheu cu buainak a daih deuh tik paohah hun than te ding an ti.

University of Hong Kong Campus chung buainak

Atu lio Hong Kong khua duhlonak a langhtertu nih an tih cemmi cu People’s Liberation Army (PLA) pawl an van i rawlh sual lai ti hi a si. PLA ralkap hi Hong Kong minung an si lo, Tuluk lei in van thlahmi ralkap pawl lawngte an si (An lahkhah cu Hong Kong khuapi cozah nih an pek hna). Tuluk cozah pi nih nawl a pek sual hna ahcun Hong Kong khuapi ah thisen tampi a luang khomi zong a si.

Hong Kong khuapi cu ram pakhat dirhmun in a dir bal lo. Tuluk ram i khua pakhat bantuk a si. British (UK) nih 1842 kum in an rak pen hna i kum 150 leng a rak pennak khua a si. British nih (nai te) 1997 lawng khan Tuluk sinah ap thanmi khua a si. Hiti a rak ap than lio ah hin British le Tuluk cozah nih biakamnak an ngeihmi a rak um. Cucu Hong Kong khuapi hi 2047 kum tiang;

• A zalenmi khuapi a si lai, Tuluk he ram khat sinak aa hrawm lai nain uknak phung bel aa dang ve lai (one country, two systems)
• Tuluk cozah nih ramleng vuanci le humhimnak lei vuanci dah ti lo Hong Kong kongah zeihmanh aa thlak lai lo
tiin (July 1, 1997) ah biakamnak an rak tuahmi hna a biapi cem mi cu an si. Kum 2047 tiang deih ding biakamnak cu tukum 2019 in cun kum 28 lawng a tang cang.

Hong Kong minung nih hin zeitik hmanhah Tuluk kan si tiah an i ti duh lo. ‘Hongkonger’ kan si an ti i an hmanmi holh zong ‘Cantonese’ a si. Tuluk ram mi pawl cu ‘Mainland China’ tiah auh an si i ‘Mandarin’ holh an hmang ve.

A luancia June 9 ni khan duhlonak langhter thok a si cang i nichiarte in duhlonak langhter ngai cu a si lo. Friday, Sat le Sunday tiin zarh khat ah nithum deuh hi duhlonak an langhter tawn. Duhlonak a langhtertu ah siangngakchia an tam bik, atu  sianghleiruun tampi zong khar an si cang caah a luancia November 12 thok khan tuni tiang cu nichiar deuh in duhlonak an langhter cang.+++

Hong Kong khuapi buainak cu mah ka hin tam deuh in relchap khawh a si

Leave a Commnet

%d bloggers like this: