Hpakan Peng Kahdohnak Ah SAC Ralkap 80 Hrawng An Thi
Salai Mangpau | 2023 August 9 — Kachin ram, Hpakan peng, Nanthmaw khua pawng SAC ralkap sakhaan pakhat le Kataing tlang (Kasen Bum) ralkap sakhaan cu Kachin Independence Army (KIA) le KPDF fomh nih August 7 zing sml 5:00am ah an va kah hna. SAC ralkap sakhaan 2 kahdohnak chung ah ralhrang lei an zapi tiawk in an thi i ralkap bawi pakhat telh in chungkhar cheukhat an tlaih hna hlei ah hriamnam tampi zong an lak khawh tiah KIA Centre lei nih an chim tiah Mizzima nih a langhter.
Cu kahdohanak ah Katiang tlang sakhaan dihlak an lak i SAC ralkap a tlawmbik 80 hrawng an thi. Suimilam 8 chung kahdohnak a rauh hnu ah sakhaan an lak i mei an khanghpiak dih hna.
Nanthmaw khuapawng sakhaan pakhat cu Saitaung khua lutnak ah a um i Katiang tlang (Kasen Bum) tlang sakhaan he mengkhat tluk aa hlatnak ah a um. Zing sml 6:00am ah Sezing hlei pawng ah a um mi Shanni Nationalities Army (SNA) sakhaan pakhat zong KIA Brigade 9 kuttang ralkap bu hna nih an lak khawh.
KIA nih an tlaihmi Kataing tlang ralkap bawi le an chungkhar cu KIA nih sii le eidin tha tein an zohkhenh/an thlop lio hna a si i, a chungkhar hna an dam in cun kan tlunter hna lai tiah an chim.
Hpakan peng Katiang tlang sakhaan le Sezing khua pawng um SAC ralkap sakhaan cu KIA nih nikhat chung an kah hna hnu ah an sakhaan dihlak an lak khawh. Cuhnu ah SAC vanlawng nih sakhaan pawngkam ah a rak kah hna tiah KIO Center thawngzamhnak lutlai Colonel Nhpang Naw Bu nih Kachin Wave ah a chim.
