Hpasawng Kahdohnak Ah SAC Ralbawi Telh In 6 An Thi, Meithal Zuun 3 An Lak Khawh
The Chinland Post | 2023 October 10 — Karen ram, Bawlakhe pengkomh, Hpasawng peng, Khonhan khua pawng ah kahdohnak a chuak i SAC ralbawi pakhat telh in 6 nak tlawm lo an thi, meithal zuun 3 le kuanzen pawl an lak khawh tiah Hpasawng PDF nih thawng an thanh.
October 4 zinglei sml 6:00am hrawng ah Hpasawng peng, Khonhan khua pawng ah a rak lut mi SAC ralkap pawl cu Karenni dothlennak phu pawl nih an kah hna i kahdohnak sml 1 hrawng a rau i SAC ralbawi 1 le adang ralkap 5 nak tlawm lo an thi. MA-1 zuun 1, MA-2 zuun 1, MA-4 zuun 1 le kuanzen tampi an lak khawh tiah theih a si.
Kahdohnak chung ah Bawlakhe PDF No. 1105, Hpasawng PDF No. 1108, DMO Local PDF, KA le hriamtlai phu tampi an i bawm tiah theih a si.
PDF hriamtlai 1 nih kahdohnak chung ah a nunnak a pek i 2 an i hliam tiah theih a si.
Hpasawng PDF cu Thanlwin ni chuahlei kahdohnak zong ah an i tel ve i August 21 ah SAC ralkap pawl he kahdohnak ah hriamtlai 2 ram le miphun caah an nunnak a pek i Internet Line a ṭhat lo ruang ah thawngthanh kan tlai hi a si tiah an langhter.
