Hramhram in uknak lak a si hnu ah inn le lo a zaamtakmi 1.2 million an um, vawlei pumpi ah inn le lo a zaamtakmi cazin 100 million a lonh

The Chinland Post | 2022 June 18 – Myanmar ram telh in vawlei pumpi buainak, hramhram thiltuahnak, dantatnak le nuhrin covo buarnak hna ruangah inn le lo a zaamtak mi hi kum 10 peh in an karh i cazin an lak thok in 2021 kum hi a sang bik a phanh si tiah United Nation High Commission for Refugees (UNHCR) nih report thar a chuah.

“2021 cazin ning ahcun inn le lo a zaamtakmi 89 million an um. Ukraine raltuknak a chuah hlan deuh ah cazin a karh tuk i a hlan kum nak in a kai deuh bantuk in kum caan saupi hnu ah a tubantuk dirhmun phak ṭhan hi a si” tiah Commisioner of United Nation High Commissioner for Refugees Filippo Grandi nih a chim.

Myanmar ram ah a luancia February thla in SAC nih hramhram in uknak a lak hnu ah inn le lo a zaamtakmi hi 1.2 million an si lai tiah ruahdamh a si. Buainak a phichuah khawhnak hnga ramdang phu nih a bawmh lo a si ahcun a tubantuk dirhmun saupi ton a si rih lai tiah a chim fawn.

Tukum thok i Ukraine kahdohnak ruangah a zaammi telh in vawlei pumpi ah inn le lo a zaamtakmi cazin 100 million a lonh cang tiah UNHCR nih a langhter. A luancia kum bak in vawlei punpi ah inn le lo a zaamtak zaamtakmi cazin a karh tiah a langhter.

Na ruahning rak langhter ve.. (Leave a comment)

%d bloggers like this: