Hramhram In Uknak Lak A Si Hnu Ah Nu 1,000 Leng An Thah Hna
The Chinland Post | 2024 September 2 — Hramhram in uknak lak a si hnu caan chung ah nu 1,132 an thah cang hna i thongnga leng (5,649) an tlaih cang hna tiah Assistance Association for Political Prisoners (AAPP) nih September 1 ah thawng a thanh.
A thi mi chung ah hriamngan le van lei kahdohnak ruang ah a thi mi an tam bik i tlaih hnu ah thong, palek sakhaan le biahalnak hmun ah thah a tong mi zong an um tiah an langhter.
An tlaih mi nu pawl cu thong le biahalnak hmun hna ah an nunnak tiang an ṭhihphaih hna tiah WOPP lei nih RFA ah an chim ve.
Nu pawl hi SAC nih phungning lo in a tlaih mi, thah mi, hrem mi le nupa sualnak lei hramhram in tuahpi mi hna zong an um nain dothlennak chung ah lungṭhawng tak in le ralṭha ngai in an i tel mi cung ah an conglawmh hna tiah AAPP nih a report ah a langhter.
SAC nih a buar mi sualnak vialte dantat piak ding in vawlei cungpi kha AAPP nih a forhfial hna.
AAPP cazin ning ah August 31 tiang, SAC nih Democracy caah a cawlcang mi 5,588 a thah cang hna tiah theih a si.
About The Author
