Hramhram In Uknak Lak A Si Hnu Kum 2 Le Cheu Leng Caan Chung Ah Chin Miphun 500 Leng An Thi
The Chinland Post | 2023 October 11 — SAC nih hramhram in uknak a lak hnu thawk in 2021 October 1 tiang kum 2 leng caan chung ah SAC ralkap nih Myanmar ramchung kumtling lo hngakchia telh in Chin miphun 528 a thah cang hna tiah Institute of Chin Affairs-ICA nih October 10 ah cathanh a chuah.
Atu cazin hi Chin ramkulh chung hmunhma leng ah Myanmar ramchung hmun kip ah a thi mi an i tel i SAC ralkap a doh cuahmah mi Chin hriamtlai pawl zong an i tel ICA nih a thanh.
Kum 2 leng caan chung ah a thi mi an zapi 528 chung ah Chin miphun hriamtlai 311 an i tel i pastor pawl le hngakchia telh in mipi 217 an i thi ve tiah an langhter.
SAC ralkap kah mi hriamngan, vanlei kahdohnak, bomrap leng ah tlaih i velh ruang ah a thi mi mipi 217 chung ah Khrihfa biaknak lei pastor 5, Khrihfa biakinn rianṭuantu le kumtling lo hngakchia 24 an i tel.
SAC ralkap kahdohnak chung ah a nunnak a liam mi Chin dothlennak phu 311 chung zong ah nu 15 le pa 296 an i tel tiah an ṭial.
Hramhram in uknak lak a si hnu Chin ramkulh chung kahdohnak ruang ah innlo a zaamtak mi 60,000 leng an um tiah ICA nih cathanh chung ah an langhter.
About The Author
