Hramhram in uknak lak a si hnu kumkhat le cheu caan chungah nu 241 an thi, 2,400 hrawng hren an tong
The Chinland Post | 2022 August 4 – Hramhram uknak lak a si hnu kumkhat le cheu caan chungah Myanmar ram pumpi in nu 241 an thi i 2,400 hrawng tlaih an tong tiah Burmese Women’s Union (BWU) nih a thanh.
Hramhram in uknak lak a si hnu 2021 February 1 in 2022 July 31 tiang tlaih a tongmi nu 2,372 le a thimi nu 241 an um tiah BWU nih a langhter.
Tlaih a tongmi chungah 194 cu sualphawt an si i sualphawtmi chungah minung 9 cu thihding in biakhiah an si. A nun chung thongtlak ding in biakhiahmi 8 le kum 9 thongtlak ding in biakhiahmi 30 an um tiah a langhter.
Atu langhter mi cazin hi BWU le AAPP nih khawmhsuatmi a si i cazin kan ngeihmi nak in a taktak dirhmun ah an tam deuh kho tiah an langhter.
Cu lengah, a thimi nu 241 hi cu dothlennak ah phun tampi in cawlcacawlcanghnak ah a thimi an si tiah BWU Joint Secretary nih DVB ah a chim.
“A thimi pawl hi dothlennak ah phun tampi in an thi. Duhlo-langhternak ah hmai chuak in hruai lioah SAC ralkap nih an kahmi hna, biahalnak ah hramhram in an tuah hna caah a thimi hna an si” tiah a chim.