Hramhram in uknak lak a sihnu ah kahdohnak 3,000 leng a chuak
The Chinland Post | 2022 March 27 – Ralkap nih hramhram in uknak a lak hnu 2021 February 1 thok in 2022 March 20 tiang ah Kawlram pumpi in kahdohnak voi 3,302 a chuak tiah Institute for Strategy and Policy – Myanmar nih March 25 ah a thanh.
Kahdohnak le hriamtlaih buainak ruangah mipi 642 leng an thi tiah a langhter fawn.
A luancia 2022 February thla chungah kahdohnak voi 584 leng a chuak i thlakhat chungah kahdohnak a tambik thla a si. 2021 December thlakhat chungah mipi 128 leng an thih caah thlakhat chungah mipi an thih a tambik thla a si ve.
Atulio Karen ramkulh chungah ralkap nih vanlawng hmang in an kahnak hna a um bantuk in Kawkareih peng zongah kahdohnak a chuak rih ko tiah khuami hna nih an chim.
Sagaing ramṭhen chung zongah mipi hriamtlai phu le SAC ralkap karlak ah kahdohnak a chuak. SAC ralkap pawl bom an puah hnawh hna bantuk in SAC ralkap pawl khuate chung an luh caah khuami hna zong an zaam.
Ralkap nih hramhram in uknak a lak hnu kumkhat lengah ramchung in inn le lo a zaamtakmi mipi 752,589 an um i hramhram in uknak lak a si hlan ah a rak um cangmi ralzaam 487,200 he fonh ahcun ralzaam 1 million leng an phan cang tiah ISP Myanmar cazin in thawng theih a si.
