Hramhram in uknak lak a sihnu Kayah ram ah minung 320 leng an thi

0

The Chinland Post | 2022 September 2 – Kayah ram ah hramhram in uknak lak a si hnuin August 31 tiang thla 19 chungah mipi 322 an thi tiah Progressive Karenni People Force (PKPF) nih September 1 an a thanh.

A thimi 320 lak ah kahdohnak chungah a thimi le SAC ralkap nih an tlaih/thahmi 261 an um i innlo zaamtak lioah a thimi 61 an um tiah a langhter.

Cubantuk in innlo zaamtak in a thimi hi a luancia July 31 tiangah 38 an um i August 31 cun 61 tiang an karh caah thakhat chungah minung 23 tiang an karh. Thla 19 chungah phungning loin tlaih a tongmi 161 an um tiah theih a si.

Ralzaam camp hna ah sii le eidin a dih thluahmah caah upa le hngakchia cheukhat a thimi zong an um.

PKPF cathanh ningah, hramhram in uknak lak caan thla 19 chungah kahdohnak voi 454 a chuak i vanlei kahdohnak voi 158 a cang tiah a chim.

Kahdohnak ruangah mipi hriamtlai 151 an nunnak a liam cang i SAC ralkap 1,499 an thi tiah a langhter. Thla 19 chungah biakinn 25 le mipi inn 1,180 a rawk cang tiah cathanh chungah aa tel.

Kayah ram ah hramhram in uknak lak hnu thla 19 chungah Loikaw, Demoso, Pharuso, Shadaw le thlanglei Shan Moebye, Pekon peng in innlo a zaamtakmi ralzaam 210,000 an um tiah Karenni mipi phu nih an thanh.

About The Author

Na ruahning rak langhter ve.. (Leave a comment)

%d bloggers like this: