Hramhram In Uknak Lak Caan Kum 2 Chung Ah Chin Miphun 380 Leng An Thi Cang
The Chinland Post | 2023 March 6 — SAC nih hramhram in uknak a lak caan kum 2 chung ah Chin miphun covo vialte buar le hramhram thil an tuah ruang ah kum tling lo hngakchia le tlaihhrem mi telh in Chin Miphun 380 leng an thi cang tiah Institute of Chin Affairs nih a thanh.
2021 February 1 thawk in 2023 February 2 tiang ah SAC nih an uknak a hmunh khawh nak hnga meithal, kuan, bom le hriamngan (RPG, 40MM, 60MM), Jet hna hmang in minung covo a buar i sualnak tampi an buar tiah March 2 ah an thanh.
SAC nih Chin Miphun nu 4 cu a bu in an tlaihhrem hna leng ah cu chung ah kum 15 hngakchia pakhat zong aa tel tiah ICA nih a langhter.
Cun SAC ralkap nih Khihfa Pastor 4 a thah cang hna i biakinn 60 nak tlawm lo a khangh cang tiah theih a si.
Chin ramkulh chung ah a rak lut mi SAC ralkap pawl nih Chin mipi 56 cu khamnak caah an hman hna i a cheu cu an hrem hna i an thah hna. Cun SAC nih hramhram in uknak a lak hnu ah Chin miphun 900 deng a tlaih/hren hna i phungning lo le tette ṭha um lo in sualnak a phunphun a bunh hna i thongthlak ding le rianhrang ṭuan ding in bia a khiah hna.
Atulio ah SAC nih a phunphun in hremnak ruang ah hmundang ah a zaam mi ramchung ralzaam 90,000 deng an um cang i Mizoram ah 40,000, Manipur ah 15,000 leng, New Dehli le adang India ram chung ah 10,000 leng an um cang tiah an thanh.
SAC nih kah mi hriamngan ruang ah Chin ramkulh chung innlo 4,300 leng a rawk cang tiah ICA sin in theih a si.
SAC nih a buar mi sualnak pawl, nuhrin covo buarnak he aa tlak mi dantatnak le ṭuanvo lakter nak hna a um khawh nak hnga vawlei cung phu nih a dik mi a zizutnak a rannak in tuahpiak ding in ICA nih nawlnak zong a langhter.
About The Author
