July 25, 2024

Hramhram in uknak lak caan kum 2 chung ah SAC nih Hakha peng mipi 14 a thah hna, 370 leng a tlaih hna

0

The Chinland Post | 2023 February 2 — SAC nih hramhram in uknak a lak hnu kum 2 chung ah Chin ramkulh, Hakha peng ah SAC kut in mipi 14 an thi cang i hliam a tuar mi 6 an si bantuk in mipi 374 a tlaih cang hna tiah CDF-Hakha Council nih February 1 a thanh mi kha kan van langhter chin ṭhan.

Khuachung kahdohnak fak deuh in kan tuah cang lai i thimnak a tlamtlin khawh nak hnga a bawmtu vialte fak pi in dantat nan si lai tiah cathanh ah an langhter.

Hakha peng ah mipi 50,000 leng nih duhlonak rak langhter a si i cozah rianṭuantu 4,000 leng nih CDM an tuah bantuk in mipi hriamtlai 3,000 leng nih hriamtlaih in dothlennak an tuah tiah theih a si.

SAC ralkap nih kum 2 chung ah mipi inn 30 a khangh cang i inn 4 an hrawh cang tiah theih a si.

Kum 2 chung ah SAC ralkap le CDF-Hakha karlak ah kahdohnak voi 166 a chuak i cu chung ah khuachung kahdohnak voi 65 kan tuah khawh tiah an thanh.

Kahdohnak pawl chung ah SAC ralkap 510 an thi, 222 an i hliam, CDF-Hakha hriamtlai 19 nih ram le miphun caah an nunnak an pek i hriamtlai 41 an i hliam tiah CDF-Hakha Council nih a thanh.

About The Author

Na ruahning rak langhter ve.. (Leave a comment)