Hramhram in uknak lak caan thla 16 chung i puahcehnak pawl ruangah mipi 119 an thi, 309 an i hliam

The Chinland Post | 2022 July 13 – Ralkap nih hramhram in uknak a lak hnu thla 16 chungah bomrap le ralkap nih tantakmi hriam puah ruangah sualnak ngei lo mipi 119 an thi i 309 hliamhma an tuar tiah UNICEF report ah hmuh khawh a si.

Thla 16 chungah puahcehnak 244 a cang tiah puahnak he pehtlai in ṭha tein khawmhsuatmi UNICEF report nih a langhter.

Hramhram in uknak lak a si hlan puakcehnak le mipi thihnak he tahchunh a si ahcun hramhram in uknak lak a si hnu puahcenak le mipi khawndennak hi fianghlang tein a karh khun.

Hramhram in uknak lak a si hlan ah langhter a simi 2020 report ahcun February in December thla tiang ram pumpi in puahcehnak 124 a rak chuak i a thimi 62 le hliamhma a tuarmi 147 an rak si.

Asinain, hramhram in uknak lak a si hnu 2021 February thok in December tiang langhtermi report ahcun bomrap le ralkap tantakmi hriam puahcehnak 161 a cang i a thimi 86 le hliam a tuarmi 180 an si.

2022 January in May tiang langhter mi report ahcun puahcehnak 83 an cang i a thimi 33 le hliamhma a tuarmi 129 an um. Cucaah hramhram in uknak lak caan thla 16 chungah puahcehnak 244 a cang i a thimi 119 le hliamhma a tuarmi 309 tiang an phan.

A cunglei langhtermi report hi ram pumpi hmunkip uknak phu pawl le himnak lakpiaktu phu pawl tinh in tuahmi puahcehnak pawl aa tel lo tiah UNICEF Myanmar report ah langhter a si.

Na ruahning rak langhter ve.. (Leave a comment)

%d bloggers like this: