Hramhram in uknak lak hnu Karenni lei kahdohnak pawl ah SAC ralkap 1,500 hrawng an thi, mipi hriamtlai 150 deng an nunnak a liam
The Chinland Post | 2022 August 1 – Hramhram in uknak lak a si hnu Karenni lei kahdohnak chungah SAC ralkap a thimi 1,500 hrawng an um cang tiah Progessive Karenni People Force (PKPF) nih a thanh.
SAC nih hramhram in uknak a lak hnu 2021 February 1 in 2022 July 31 tiang Karenni ram ah SAC ralkap nih an buarmi sualnak pawl kong PKPF nih a khawmhsuat i a langhter.
Karenni ram ah 2021 May 20 thok in kahdohnak pehzulh in a chuak i kumkhat le cheu caan chungah kahdohnak 390 a cang tiah a thanh.
Kahdohnak chungah SAC ralkap 1,451 an thi i SAC ralkap mawṭaw 54 hrawh khawh a si tiah a langhter. Kam khatlei ah mipi hriamtlai 147 nih ram le miphun caah an nunnak an pek tiah a thanh.
Kahdohnak chungah fah a tuarmi SAC ralkap nih vanlei kahdohnak hi voi 157 tiang a tuah tiah PKPF nih a thanh.
SAC ralkap nih mipi pawl zong a kah hna i SAC ralkap vanlawng nih kah ruang, hriamngan kah ruang le tlaih/thah ruangah mipi 255 an nunnak a liam tiah a thanh.
Kahdohnak pawl, SAC rat ruang le hriamngan ruangah khuami sing tampi ralzaam dirhmun an pha i mipi 38 cu ralzaamnak ah an thi tiah a langhter.
SAC ralkap hriamngan kah ruang, inn khanghpiaknak ruangah biakinn 23 le mipi inn 1,100 leng a kaang tiah theihternak a tuah.
SAC ralkap nih phungning loin a tlaihmi 260 an um tiah PKPF nih mipi a theihter.
Karenni hmunhma ah kahdohnak a fak i SAC ralkap cu KA, KNDF, PDF phufonh nih an kah lengmang hna.
About The Author
