Hramhram uknak caan thla 18 chungah mipi 6,200 leng kan tlaih hna tiah SAC nih a chim
The Chinland Post | 2022 August 1 – SAC nih hramhram in uknak a lak hnu 2021 February 1 in 2022 July thla dongh tiang hramhram uknak caan thla 18 chungah tlaih a tongmi 6,236 an um tiah SAC hruaitu General Min Aung Hliang nih August 1 a biachimnak ah a telh.
SAC nih a uknak thla 18 chung an rianṭuannak kong he pehtlai in a chimnak ah a chim chih.
Kumkhat le cheu caan chungah kuthlonh bom in chehnak le bomrap puah hnawhnak voi 7,246, kahdoh/thahnak voi 6,567 le meikhangnak voi 1,094 a cang i hriam phutling 6,311, zen phuntling 335,184, kuthlonh bom le bomrap 11,715 kan fim khawh tiah a chim.
A thimi cungah phungki, Nun, cozah rianṭuantu, hngakchia, uknak lei rianṭuantu le mipi 3,484 leng an um i hma a pumi 3,065 le a tlaumi 41 an um tiah a chim.
Kahdohnak chungin Sagaing ramṭhen ah voi 4,026, Yangon ramṭhen voi ah 2,442, Mandalay ramṭhen ah 2,194, le Magway ramṭhen ah voi 1,359 tiin a tambik an cang tiah a chim.
AAPP thanhmi cazin ahcun hramhram in uknak lak a sihnu 2021 February 1 in 2022 July 29 tiangah tlaih a tongmi 11,820 an um i cu chungah 1,364 cu thongthlak an si tiah a langhter.
Mipi thimmi cozah tlak hnu ah hramhram in uknak a latu SAC nih uknak caan thla 6 sauh chap a si tiah July 31 ah a thanh.
Hmanthlak : Ralkap nih Hakha khuachung duhlonak a langhter mi pawl an rak tlaih lio
