Hramhram uknak lak ruangah ramchung rianṭuan khawhnak lam a zor tuk tiah ILO nih a thanh
The Chinland Post | 2022 August 2 – SAC nih hramhram in uknak a lak caan thla 18 a rauh hnuah Myanmar ramchung rianṭuan khawhnak lam a tlawmtuk caah thinphang a si tiah International Labour Organization (ILO) nih August 1 ah a thanh.
“Atulio rian a har tukmi dirhmun chia le rianṭuan ning a ṭhat lo tuk mi hi thinphan awk ngaingai dirhmun a si” tiah Myanmar ram ILO penhtlaihnak rian a ṭuantu Mr. Donglin Li nih a chim.
Atulio dirhmun hi hramhram uknak lak a si hlan 2020 he kan tahchunh a si ahcun rian 1.1 million a zor tiah ILO nih a ruahdamh.
Hramhram in uknak lak hnu 2021 chungah Myanmar ram in chuahmi thilri 8% a tla i 2022 kum cheu tiangah 2% a tla chap tiah ILO nih a langhter.
Hramhram in uknak lak ruangah Myanmar ramchung rianṭuan khawhnak lam cu uknak lak hlan dirhmun he cun aa ralkah tuk tiah ILO nih a thanh.
Cun rianṭuantu nawlngeihnak (Rights) zong an buar kha hmuh khawh a si tiah a langhter.
SAC nih hramhram in uknak a lak hnu ah Myanmar ram ah investment a rak tuahmi company pawl an chuah le bank rianṭuannak pawl a dir caah sipuazi rian pawl harnak an tong i rianṭuan khawhnak lam zong a zor tuk.
Cucaah Myanmar a pawngkam ram a simi Thai ah rianṭuan ding in a kalmi Myanmar rammi tampi an um i mino tampi cu Japan, South Korea ram hna ah rianṭuan ding in an kal.
Cubantuk ramleng chuahnak ah phungning loin (a tanglei) in a kalmi pawl cu ramri ah palik nih a tom tom in nifatin an tlaih hna zong kha hmuh khawh a si.
