Hrawh piak le sungh a simi ro thilri cazin kan pe uh tiah Save the Heritage phu nih nawlnak a thanh
The Chinland Post | 2022 July 29 – Hriamtlaih buainak ruangah sungh a simi hlan lio ro thilri pawl khawmhsuat kan duh caah kan pawngkam le internet cungah kan hmuhmi hlan ro thil pawl sungh le hrawh piak a sinak thawngpang kan pe hram uh tiah Save the Heritage phu nih nawlnak a tuah.
Save the Heritage phu cu hriamtlaih buainak ruangah nunphung ro thil hna a tlaunak hnga lo ti khawhnak lam in a cawlcangmi hlan thil kong kherhhlainak le nunphung ro thil hna ṭha tein kilven a thiammi pawl fonh in Britain ram ah hram a bunhmi Non-Government phu pakhat a si.
Khawmhsuat khawhmi rothil a rawkmi cazin kha mipi sinah ṭha tein langhter ṭhan a si lai tiah Save the Heritage phu nih a thanh.
Rothil hrawhpiak a sinak thawng na pek tikah
1) Hrawh piak a sinak hmun/inn
2) Khua/khuate (GPS ah sawh khawh a si ahcun)
3) Nicaan
4) A hrawktu phu
5) Hrawh piak a si daan thil sinning
6) Hmanthlak pawl Save the Heritage page chat box asilole Signal number +447729742542 asilole Telegram number +447729742542 ah kuat khawh kan si tiah bawmhhalnak a thanh.
