Hrelh Sualmi Ah Thiltha A Chuak Tawn
Pu Khua Kung/ Photo: The Chinland Post
The Chinland Post| 2018 November 6| Atu karlak Hakha Post in hri awhnak kong Hakha Post Chief Editor, Emmanuel Baptist Church in Rev. Dr. Senior Pastor le Pastor Kam Lo nih thil a rak cangmi in siseh, Pathian bia sermon in siseh, nan hmuhning le nan duhning kong nan tialmi cung ah kaan lawmhpi hna.
Hite hi ka van tenhtak lai. Parthlaam le Kamlo min hi zaran min sawhsawh le chuahsemnak Lai min an si lo. Parthlaam le Kamlo hi miralchia, mi depde, mi lungnau, mi hruldup an si bal lo. Catialtu nih an tialmi ah a tling a tha dihmi an si dih ko ka ti. An thiamlo, an thiamlo ka ti duhnak a si hin lo. An hrelh sual dahra maw ti in ka ti duhnak tu a si. Soisel, tlinlonak bia kakhat hmanh chim awk a um lo.
A dikmi bia: Hakha Khuahlun, Sangte sang ah Phiar Mang pa hi anmah innchung kaan ah hri cun a rak i awk i an hmuhka ahcun pipen aa vuar an rak ti. Caan tlawmpal ah aa awkmi a si ti an hngalh. A hri phoihtu hi catialtu a pa u le Khenglawt chungmi pakhat an rak si. Pupa phungningte in ka pa u cu Siapi in an rak thianh. Khenglawt pa hi Vokpi in an rak thianh ve. Mah chungkhar siseh, midang zong siseh, hri phoih chahpiaktu hi pupa phungning in bawi le michia an um a si caah michia hi vok, bawi hi Sia in thianh phung hrimhrim a rak si.
Kum 2002 chung ah Hakha khua ah Laimi lawng si lo in Kawlmi tiang hri in a rak i awkmi hi minung 10 leng an si cang. Aho khuabawi nawlngeimi si hna seh, bukip pastor pawl zong nih thil tuahmi pakhat hmanh a rak um lo. Ka fim, ka thiam, ka hngalh tinak si hin lo in Pathian nih a ka chimh tiin ka ruah. Rawl ulh thlacamnak lawng in tei khawh a si ko lai ti in ka ruah caah Hakha Khuahlun general meeting kan tuah. Thil sining ka chimh hna, an hna a tla dih. Sangruk khuabawi le bukip fonh lutlaitu pastor ka chimh dih hna.
Mah le sian tawk in thawh i zanriah dumtinak Sia pakhat kan cawk. Rawl ulh thlacamnak hruaitu ah Rev. No Peng, pumhnak sermon chimtu ah Rev. That Thio le Rev. Ni Dum an rak si. Bu lei in Rev. Za That (tleicia), Hakha pi aiawh in catialtu nih biatawi kan chim. Pumhnak service dih in zapi te in rawldumtinak kan tuah. Hi rawlulh thlacamnak le pumhnak service cu 2002 November 10, SMS- Hakha Khuahlun sianginn ah kan rak tuahnak in 2016 karlak cu hri awhnak in a thimi an um hraw ti lo.
Tedim nu pakhat nih a ka timi cu; kannih Tedim cu kumfate in khuami caah thlacam pumhnak kan ngei a ka ti. Ks. 1000 thlacamnak caah a ka pek. Mah thil ka tuah lio ah ka lungre a thei, ka tha a ba. Voikhat kal lawng in a dih lo. Sangruk khuabawi ton zong a fawi lo. Zeizong cung ah Pathian nih a kan bawmh, a kan tanpi caah tlam a rak tling dih. A dih zan cu Pathian sin ah lunglawmhnak fakpi in thla ka rak cam. Ka lung hna a ngam tuk.
Mizapi le khua le ram caah thiltha tuah hi a fawite mi a si bal lo. Nan catialmi ah doh le cawnpiaknak tiin a um. Hri awhnak hi an chung in Satan nih biathli a ruah hna i a hnu ah an kut nih a tuah i a cangmi thil an si. A sullam cu anmah an si lo, Satan khuachia an si. Satan cu doh le cawnpiak cun tei khawh a si lai lo. A fim, a zer tuk, tektik a thiam tuk, bible bia zong a hngal tuk. Tihmi a ngei lo, ralbawi bik le hriamnam zong a tih lo. Upadi zong a tih bak lo. A tih bikmi cu rawl ulh thlacam in Jesuh min hi a tih bikmi a si.
Hla cauk ah Jesuh min an theih ah rul hreu mi an tli ti a um. Khuachia nih a tuahmi pa, zultu nih thla an campiak i an chuah kho lo. Jesuh an chimh, hi bantuk hi cu rawl ulh thlacampiak lawng in a dam lai a ti hna.
Hlan tlangbawi hi atu lio Pathian riantuantu, pastor le sayate hi nan si. Bible chung ah tlangbawi nih kumfatin a miphun caah thla a campiak hna ti a um. Judah mi nih lanhtak puai le Purim puai hi a kum fate an tuah. An techin farpar tiang hngalh in tuahmi thlacamnak a si. Tuah hnawh chan cu Pathian nih a mi hna an ral kut in a khamhnak hna philh lonak le hmailei ah an ton than ti lonak caah a rak si.
Cu ve bang in Hakha tlangbawi nih Sia in Rungdanghnak va ah thla a cam tawn vemi cu; “Sa ral kut in siseh, tlangrawi pul thihnak in siseh, thi chiabik hri awh thihnak in siseh, zawtnak tlangrai phunkip in kan luatnak caah thla a cam tawnnak cu a si”.
Pathian hi tuahmi cung in aa phuang tawn. Tuah lo in kaa lawng chimnak cun aa phuang bal lomi Pathian a si. Hakha khualipi ah bu 25 renglo, pastor 100 lengkai nan um cang. Cathiang chung ah hruaitu cu mizapi he dong 2000 hlat in nan um lai a ti. A sullam cu thatnak paoh ah lam hmaisatu nan si lai tinak a si ko. Thildik, thilfek, thiltha zapi caah thatnak tuah cu thangchiat, retheih, thabat tuar hnu lawng ah atak in a chuak tawn zungzal.
Ka tlak lo bu in ruahnak pek kaan duhmi hna cu; nan fanu, nan fapa, nan Khrihfabu caah nan re kan theihpiak uh. Nan tha zong kan batpiak uh. Sifah retheihnak zong kan intuarpiak hmasa u law atu lio hrih awh thihnak in siseh, Pathian hngal lo zuu rit bu in a thimi hna siseh, kan zatlang nun a that, a dinnak caah Jesuh rovuih takmi rawl ulh thlacamnak in kan tuahpi ve ulaw Pathian nih a bia cu a kilven, thluachuah a pek zungzal bang Pathian mi hman minung nih lam hmaisak in lungthin takte in rawl ulh thlacamnak in Pathian kan nawl ahcun Satan riantuannak hi fawite in kan tei ko lai. Lam hruaitu hmasa bel kan herh. Kan tuah taktak ahcun kan ram, kan miphun pumsa in thlarau tiang damnak kan hmuh hrimhrim lai.
Pastor Khua Kung (Retd.)
Hakha Khuahlun
Biakilh: Hi cabia cu catialtu pumpak hmuhning le ruahnak a si.
About The Author
