Hriamtlai poah NUG he ṭanṭi le Dohthlennak hi pumpak hlawknak ah tuahlo ding a biapi: KIO Chairman Gen. N’Ban La

General N'Ban La, Chairman, Kachin Independence Organization (KIO)

Post Staff| 2022 February 5 — Tlangcung hriamtlai phu vialte aa khatmi hmuitinh tangah hramhram uknak hrawh ding in Kachin Independent Organization (KIO) Chairman Gen. N’Ban La nih kum 61nk Kachin miphun dohthlennak ni (Kachin Revolution Day) philhlonak tuahmi forhfialnak a chim tiah theih a si.

Tlangcung hramtlai vialte kan zapi in aa khatmi hmuitinh tang ah hramhram uknak cu hrawh cikcek ding in le National Unity Government (NUG) a cozah cu a lamkip in bawmchan dingah Kachin Independent Organization (KIO) Chairman General N’Ban La nih kum 61nk Kachin miphun dohthlennak ni ah a chim tiah Kachin thawngzamh tampi nih an ṭial.

Tlangcung hriamtlai vialte kan zapi lung khat le lungrual tein “Hramhram uknak hi hrawk cikcek hna u sih” timi tinhmi tangah rian kan ṭuanṭi lawngah kan tei khawh lai.

Khat le khat i zumh lonak le upatnak a um lo ahcun ningzah kan i phorh sual lai ding hi thinpang a si tiah a chim fawn.

Hramhram uknak hrawh cikcek dingah hriam a tlaimi phu vialte zong NUG hruainak tangah i fonh ding kong zong a biapi in a chim tiah Kachin (Jinghpaw) holh in a chimmi cherchan in thawngzamhnak nih an tial hi a si.

Ram le miphun dawtnak thinlung tak he a lamkip in hriamhrai a tlaimi phu vialte cung zongah lunglawmhnak tampi kan ngei tiah dohthlennak ah a telmi tampi cung ah lunglawmhnak a chimchih.  A pehchih mi cu, sihmanhsehlaw, min tampi put si loin NUG hruainak tang ah rian kan ṭuanṭi a si lo ahcun hmailei caan sau tikah buaibainak a chuak kho timi hi kan i ralrin peng ding a si tiah a ti.

Daw Aung San Suu Kyi hruaimi National League for Democracy (NLD) cozah chan lioah tuahmi Panglong (Pinlung) Conference cu rianhma a rak kal lonak zong a chim chin.

“Kumzabu 21 Panglong he pehtlaimi tonbiaruahnak a thawkka ah United Nationalities Federation Council (UNFC) min kai kan thawk. [1947 February 12 ah] Panglong biahrennak ning in Ramkomh Kawlram cu Federal kha a hram thlak in dirh dingin le biaruahnak ngeih ding in rak hal (forfial) a si.

Nain, culio nawlngeitu simi Aung San Suu Kyi nih, “Panglong hnatlaknak cu tlamtlinnak a ngeih lo lawng si loin zapi teltumnak a um lo caah hman awk a tlak lo tiah” a rak ti. Tlangcungmi hna nih zeidah kan hal khawh lai timi nak in zeidah kan pek khawh deuh lai timi hi nan ruah deuh ding a si tiah namneh kan rak tong. Kum zabu 21 Panglong Conference cu voi hnih thum hrawng tuah a si ko nain tlangcungmi nih kan chuahpi mi pawl cu rak cohlan piak lo hrimhrim a si.

Hiti a chimmi hi, Tlangcung ramkhel cawlcangtu ceukhat nih a lungfahnak a langhtermi a si tiah an char mi social media cung ah hmuh khawh a si. Micheu nih hitin an char; Phundang in chim ahcun, “Daw Aung San Suu Kyi nih Panglong Hnatlaknak hi a muru a tling lo tiah a chim pinah Tlangcung miphun kha ‘zeidah ka hal lai timi lawng ruat loin zeidah ka pekchanh lai ti tuhi ruat uh’ tiah hramhram-uktu (aa-naa-shin) bantuk in a rak kan ti” tiah General N’Ban La nih a lungfahnak a langher fawn.

Miphun ngan sinak a ngeimi Kawl cozah le Kawl ralkap nih chuahpi mi kong pawl lawng kha ceihmai a si caah kum zabu 21 Panglong i tonnak cu tlamtling lo ngai in a tap hi a si” tiah General N’Ban La nih a chim tiah theih a si.

Atu bantuk caan chia lioah, Tlangcung miphun pawl hmunhma hna cu eidin lei harnak ton a si caah mah miaknak caah rianṭuan hrial hrim ding zong a biachimnak ah a telh chih.#

Biakilh: General N’Ban La nih Kum 61nk Kachin Miphun Dohthlennak Ni ah a chimmi chung in a tlaknak in lak le lehmi a si. ~Editor 

Na ruahning rak langhter ve.. (Leave a comment)

%d bloggers like this: