Hringtu A Nu Le A Farnu An Thih Thlakhat Tluk Ah Motor Pahnak In Pu Tum Cung A Thi
Pi Ui Cer, Pi Van Bawi Zi le Pu Tum Cung an nun lio hmanthlak
Salai Cung Cung|2018 July 3| Hakha Dawrthar sang ah a ummi Pu Tum Cung cu June 2 zanlei suimilam 5:00 hrawng an innhmai ah lungphor motor nih a pahnak in a thi. Hringtu a nu le a farnu nih an thihtaknak thlakhat tluk ceo te lawng a si rih tiah kan theih.
“Motor pahnak le khawndennak a ton caan hi July 2 zanlei suimilam 5 hrawng ah a si. Pu Tum Cung hi motorcycle KenBo-R -125 he an inn in leng a chuak. Leng a chuah cangka an inn hmai, Dawrthar sang, Kyaw pawng ahkhan lungphor motor nih lonh a hun timh. Cuti a hun lonh timhnak ahcun a cycle hnulei le motor aa hnor. Motor nih a hrial ko nain tlawmte an i hnormi kha cycle caahcun a fah tuk caah Pu Tum Cung cu a tlu. Motor a hnulei ke nih a lu a rial chih caah hmakhatte ah a hmun ah a thi colh” tiah cuka pawng i dawrtuahmi a rial lio a hmutu pakhat nih The Chinland Post ah a chim.
“A thimi Pu Tum Cung hi kum 52 a si. Rev. E. Mang Kio Thang (tleicia) le Pi Ui Cer (tleicai) fapa a si. Motor a mongtu hi Tin Ko Ko Win, kum 25 a si. A pa hi U Myat Htay a si, aum nak hi Gangaw lam Hakha in khan 13 a hlatnak hmun ah a ummi a si. Amah abiaknak hi Buddhist a si. Tin Ko Ko Win hi motor license le driving license zong thate in a ngeimi a si. Motor a monghnak zong a sau ngai cangmi a si” tiah tiah Palek bawi Yehmu U Kyaw Oo nih The Chinland Post ah a chim.
“Motor min hi Forland asi, motor number cu 1N/7337 a si i motor ngeitu hi U Yan Lin Naing a si. Motorcycle hi 125 KenBo- R, license ngeimi a si. Motor mongtu Tin Ko Ko Win cu Hakha palek bawi U Ko Ko Aung nih ahmuh (case) a tuah i ya-za-tat-gyi pohmah 304-A in dantat a si lai” tiah a biapeh ah a chimchih.
May 31 zan, Hakha innkangh ruang ah Pi Ui Cer (kum 87) le Pi Van Bawi Zi (kum 49) le Pi Hliu Ngo (A Han Nu) an paam. Cu lio ah a thimi Pi Ui Cer hi Pu Tum Cung hringtu a nu a si i Pi Van Bawi Zi zong a chuahpi a far a si.
Hakha Khuahlun in upa pakhat nih, “Hringtu a nu le a farnu nih an thihtaknak thlakhat tluk ceo te lawng a si rih. Cu pin ah amah hrimhrim zong mino te a si rih fawn. An ngaihchiatnak mitthli hmanh a daih hlan ah atu bantuk ruahlopi in mual a kan liamtak cu a fak tuk, ka celh hrimhrim lo. Zeiko dah an ton e! Zawtfah zong si lo in atu bantuk in mual a kan liamtak cu ka celh hrim lo. Pathian tu nih tantakmi chungkhar an ngaihchiatnak hnem hna sehlaw lungdaihnak hnangamnak pe zau ko hna seh” tiah The Chinland Post ah a chim.
Pu Tum Cung Tunbia Tawi
A pa min: Rev. E. Mang Kio Thang (tleicia)
A nu min: Pi Ui Cer (tleicia)
A nupi min: Pi Mang Hliang
A fale: Pi Ngun Kip Cer+ Pu No Peng (USA), Pu Mang Lian Sang + Pi Nelly (USA), Pa Thang Mang Lian (USA), Nu Dawt Hlei Sung, Nu Elly le Nu Biak Chin Tial an si.
Chuahpi unau: Pa Ni Ceu (tleicia), Pi Ngun Ci, Pu Siang Kung, Pu Ngun Hram (tleicia), Pi Zing Thai (Malaysia), Pi Sui Fom (USA), Pu Tum Cung (amah), Pi Tial Thai, Pa Andrew (tleicia), Pi Van Bawi Zi (tleicia), Pastor Sui Ling Thang, Pa Thang Ding (tleicia) le Pa Thawng Cin Mang (tleicia) an si.
Photo: Par Te, Van Siang Mang
About The Author
