Hringtu Nule Upat Peknak Le Pathian Bia (Mother Day Sermon)

Salai Holy Tawk Tling Thang| 2019 May 8| 2019 May 12 ni cu vawleicung ramkip nih tuahmi le sunhsakmi “Hringtu Nule Ni” (Mother’s Day) a hung si than cang lai. ‘A sunglawimi Hringtu Nule Ni’ tiah hringtu nu a simi paoh nan kut zatial nem kaan tlaih hna. Khuaza ramkip hringtu nule dihlak nan cung ah BAWIPA nih lu nun ngandamnak le nun khua saunak thluachuah in pe cio ko hna seh.

Hringtu nu nih nunpi rihmi caah “ka nu, kaan dawt” timi bia kaa khat tal thinlung tak in chim i zuam cio usi. Hringtu nule nih nunpi ti lomi hawikom dawt cheukhat ca ahcun “Ka nu kan dawt” ti chim caan a um kho ti lo, vanram phanh hlan cu…

Cucaah, BAWIPA nih a leh hna i, “Nu nih a fa cu a philh kho hnga maw? A chung chuak cu daw lo in a um kho hnga maw? Nu nihhin cun a philh hmanh a philh kho ko hnga, sihmanhsehlaw, kei nihcun kan philh bal hna lai lo” tiah a kan ti (Isaiah 49:15) tu a nungmi Pathian kan ngeih kha philh hlah usi.

Ni le thla liam in kum le caan zong i thleng in liam hmanh sehlaw, nule dawtnak cu fale caah aa thleng in a liam kho lo. A luang zungzalmi tiva hmanh khi a reu caan a um tawn nain nule dawtnak cu a reu kho lo. Khuacaan hoih in a parmi pangpar hna hmanh khi an uai than tawn, sihmanhsehlaw, hringtu nule nan dawtnak cu zeitik hmanh ah a uai bal lo.

Thinlung, taksa, thlarau in a khatmi minung nang le kei cu chim lo, saram hmanh nih hringtu nule nih an fale cung ah dawtnak an ngeih. Hringtu nule nih fale cung ah nan kan ngeihmi dawtnak cu a zungzal in a hninghno, a rim a hmui. Fale nih hringtu nule dawtnak cu zeitluk cham kan timh hna zong ah an kan dawt tluk cun kan cham kho hna lai lo.

Phungthlukbia 23:25 nih a kan cawnpiakmi cu; “Na nu le na pa cu, lawmhter hna. Nangmah an hringtu cu lawmte in um seh,” a ti bantuk in fale nih an caah leiba nganbik kan ngeihmi cu caan tawite an nun chung ah an ngaihchiatter lo, lungthin nuamte in umter le lawmhter hi a si. Hihi fale nih nu le pa dawtnak kan cham khawh vial cu a si ko hnga.

Chinram cu a kan hringtu kan nu bantuk a si i nu nih a fa a dawt bantuk in kannih zong nih Chinram kan dawt, kan zohkhenh le kan sersiam ve a hau. Timote a pi Lois cu Zunis i a nu a si. Paul nih zumhnak lei ah a chimthiam, upatnak a pek. Lois cu hringtu pi, zumtu pi tha le zohchunhtlak nu a si. A fanu Zunis lawng si lo in a tupa Timote zong anmah holhte in bible a cawnpiak.

Zunis cu Khrihfa a si, miphun dang (Khrihfa a si lomi) pa he an i um nain a fapa Timote kha anmah holhte in Bible bia a cawnpiak. Khrihfa zumhnak le nunning in lam a hruai. Chungkhar ah remhdaihnak a umter. Zunis hi nunphung a upatmi nu saltha a si. Nunphung upat le dirkamhnak cu holh in aa thawk. Laiholh thiam cu Lai nunphung dirkamh lakah a sang bik pakhat a si. Lai holh hman cu Lai nunphung nunpi a si. Cucaah, Lois le Zunis bantuk Chinnu (hringtu nu a si rih lomi zong) nih Timote bantuk bochan tlak pasal tha a hrin khawh, a cawm khawh, a sersiam khawh.

Vawleicung raltuk thawng Napoleon nih, “French ram ahhin nule lianngan um hna seh law, fapa lianngan an chuak ve ko lai” tiah a rak ti. Cu bantuk in nihin kan Chin miphun lakah zumh awk le bochan awk a tlakmi nusal tha le nu lianngan nih bochan le zumh awk a tlakmi fanu/pa tha nan kan hrin khawh ti hi i hngalh a hau.

Zunis le a nu Lois bang Khrihfa zumhnak le nunning in chungkhar ah fale lam a kan hruai i daihnak le remnak a sertu hringtu nu nan si ahcun zohchunh awk a tlakmi fanu/pa, tunu/tupa tampi kan chuak kho ko. Cu bantuk si ding cu Sunghno kan nu Chinram nih ti bang a halmi le Pathian zong nih amah sunparnak caah rian khinhmi kan si.

“Hringtu nu (amah) cu a kut theitlai ruang ah khan thangthat u, Hauka ah khan amah cu a riantuannak nih khan upatnak hmuhter seh” (Phungthlukbia 31:31) a ti bantuk in zumh awk tlakte in thiltha nan tuahmi cio nih upatnak le mithmai tha in hmuhter hna seh.

Cucaah, ram le miphun, Khrihfabu le innchungkhar caah bochan le zumh awk a tlakmi hringtu nule (nu vialte) nan dihlak upatnak kaan pek hna. Innchungkhar, Khrihfabu, ram le miphun zumhtlak le dingfelte in a thanchotertu le thluachuakmi nu (hringtu) si chinchin ko u.

Siangpahrang nupi Esther bang Pathian i bochan bu le zumhawk tlakte in ram le miphun a chanhchuahtu (a luatter) le “a fale nih, thluachuak nu an ti i a va zong nih a ti ve i a thangthatmi nu” (Phungthlukbia 31:28) si hram cio ko sawh uh.

Leave a Commnet

%d bloggers like this: