HUSO Show Caah David Lai Le Van Siang Mang An Sawm Hna
Salai Cung Cung|2019 March 20| HUSO (Hakha University Student Organization) nih a ralaimi April 10 zaan suimilam 7 in Carson Hall ah hlasaknak le laam hmuhsaknak an tuah dingmi ah hlasak thiam minthang David Lai, Van Siang Mang le hlasak thiam minthang a dangdang zong an sawm hna tiah kan theih.
“Tutan HUSO show hi avoi 1nak kan tuah a si lai. Hlasatu ding ah minthang David Lai le Van Siang Mang kan sawm hna. Cu pin ah kanmah Sianghleirun siangngakchia chung in Esther Dawt Chin Sung, Aa Lian, Mercy, Ruth, Katie Biak Hlei Par, George, Van Biak T Strove, Thankawng, Joseph Biak Ling Thang le DoDoo zong sawm chih an si. Cun Band ah Fiakfairock, Designer ah Wulfric Agassi, Program cu Hlasaknak le Laam hmuhsaknak in caanhman a si lai” tiah HUSO President Salai Biak Lian Thang nih The Chinland Post ah achim.
“Hi show an tuah hnawhchanak bik a ruang cu phunthum a si. Pakhatnak ah Hakha mino pawl thinlung thawchuahnak le thumhnak, pahnihnak ah ringawn lei thancho khawhnak, pathumnak ah Ticket zuar man in hmailei riantuan cawlcanghnak ngeihnak ding caah an si. Hi Concert tuahnak ding ah siangngakchia hlun pawl (senior friends) nih bawmhnak an pek hna tiah kan theih.
“Hi hlasaknak cu kanmah nih timhtuahnak cu kan ngei nain nu le pa u le nau nih thazaang nan kan pek lo cun tlamtling ding si lo. Cucaah nanmah bawmhnak kan herh ko. HUSO nih harnak tete tampi kan ngei, cu pawl lak ah kan herh bik mi cu kan cawlcanghnak ah hin zung pakhat kan herh. A ruang cu minung hi kan i thlen lengmang tikah kan thilril tete fimnak a um lo a vaivuan. Cun sponsor zong a um lo tikah kan mah siangngakchia thazaang in fund kawl chom a si caah tangka lei zong in kan har ngai. Kan thazaang a dirbik pakhat cu Hakha ah hin peng le tlang Bu hi kan tamtuk tik ah kan mah cawlcangh lio le pengtlang cawlcangh he aa ton lio caan hin kan thazaang a dir tuk tawn” tiah a chim chap.
HUSO nih nikum an rak cawlcanghnak pawl cu pakhatnak ah Hakha sianginn ah taang 5 in taang 7 tiang sianginn i cawn deuh lo mi tete Laica, Lai nunphung, ngandamnak kong tibantuk zarhkhat chung CCU ah camp an tuah i Education Awareness ti tlangtar in minung 100 leng an kai kho.
Pahnihnak ah Rungtlang ah thinkung cinmi tete zohfelnak an ngei. June thla ah taanghra awng ka mi tete Major introduction cawnpiaknak an ngeih hna. Hakha khuachung ah hmunthur an char, HUSO Sport Day an ngei kho. Cun 2019 May thla chung ah Education Awareness Camp tuah an i tim than tiah kan theih.
About The Author
