I bawmhchanh cu a ṭha ko nain…
Group people community with disabilities wheelchair handicap. Color vector illustration EPS8
2022 April 17 — Midang pakhat/mibu pakhat bawmhchanh, anmah caah rianṭuan cu a ṭhami thil tuah a si. Zeibantuk biaknak, zeibantuk miphun le zeibantuk minung hmanh thangṭhatnak thil tuah pakhat a si. Kan zatlang nunnak zongah i bawmhchannak pawl kan herh ko. A hlei khun in Myanmar ram dirhmun ah bawmhchannak pawl, midang caah rianṭuannak pawl kan tuah chin a hau ko.
Cucaah, midang pumpak pakhat siloah mibu pakhat bawmhchanh, anmah caah rianṭuannak i a hnulei ah, thinlung put (Attitude), hmuhning/sining (Concept) he rianṭuannak i a phichuak (Impact) hna zong telh chih in khuaruah a hau. Cuti kan ruahchih lo ahcun, kan bawmhmi hna cungah ṭhatnak nakin chiatnak a chuak deuh lai. I tuknak hmun dang, ah sualnak hmun dang a si sual kho. A hleikhun in pumtlamtlinglo hna caah kan ṭuan a si ahcun, kan hmuhning pumtlamtlinlo nak kha a biapi tuk.
Chan sinning ah zatlang nih pumtlamtlinglo hna caah a lamkip in rian a ṭuan cuahmah. Asinain a tutiang, pumtlamtlinglo hna nih zatlang ah a sinning tein an i teltum kho lo. Zeiruang kan ti a si ahcun, pumtlamtlinglo hna caah rianṭuannak (siloah) bawmhchannak hna hi pumtlamtlinglo kan hmuhning hrap a hman lo caah a si. Kan hmuhning a dik lo ahcun, kan rianṭuannak a dik lai lo, kan rianṭuannak a dik lo ahcun a phichuak a ṭha lai lo.
Pumtlamtlinglo hna caah rian kan ṭuan tikah bawmhhau an si timi ruahnak (Charity Model) in rianṭuan hi a ṭha lo bikmi a si.
Pumtlamtlinglo hna an derthawmnak hna kha char in zaangfah awltlak le minung dirmun a phan lomi an si tiah mipi nih kan zoh hna i zangfah awktlak a simi kha bawmhchan ding ah fund kan kawl khi a si. Bianabia kan chim a si ahcun, a nih cu ke a ngei lo, zaangfak te a si, kan bawmh a hau, kan bawmh lo ahcun harnak a tong lai tiah fund kawlnak tuah tbk… Cu bantuk thil kan tuah ruangah pumtlamtlinglo hna hi zatlang nunnak zangfah awktlak a simi ah kan phakter hna i zatlang chungah limhang ṭha tein a ngeimi minung ah an dir kho ṭhan ti lai lo.
Pumtlamtlinglo hna i an chanbaunak kha sawhpiak in bawmhhal, fund kawl hna hi a dikmi thiltuah a si lo. Cubantuk thiltuah cu pumtlamtlinglo hna bawmhchanh a si lo hlei ah minung pakhat i a limhang nehsawh a si deuh. An zalonnak kan va horsuan hna a si. Nuhrin covo a upatmi, minung le minung tlukruang tein man a ngeimi atu chan ah, cu bantuk thiltuah hi aa tlak lo.
Cuti kan chim a si ahcun, pumtlamtlinglo hna hi kan bawm hna lai lo maw timi halnak a um. Pumtlamtlinglo hna hi kan bawmh hna ding a si. Kan bawmh hrimhrim hna a hau. A pum sining (Identity) ruangah bawmh si lo in an tonmi ningcang (Condition) ruangah kan bawmh hna a herh. Bianabia ah, zak in dohmi lamkalnak ṭhengṭhunh (Crutch) kan bawmh hna hei ti ko u sih. A ke a ṭhat lo ruangah kan bawmhmi si loin khua chungah tluang tein aa chawh khawhnak hnga kan bawmhmi a si ding a herh.
Cun, a mit a ṭhat lo ruangah eidin kan pekmi si loin, Crisis lioh an eidin le an umṭhutnak kong kan tawlrelpiak hna caah eidin kan pek hna ding a si deuh. Kei ka hmuhning ahcun, bawmhnak hi minung pakhat i a pum sining ruangah ṭuan a si i Humanitarian cu sining tonmi (Condition) ruangah ṭuan a si. Zangfah bawmhnak Charity cu minung he aa pehtlai i Humanitarian cu condition he aa pehtlai.
Cucaah, mdang pakhat (asiloah) mibu pakhat bawmhchannak, anmah caah rianṭuan cu a ṭhami thiltuah a si ko. Nain pumtlamtlinglo hna bawmh kan duh a si ahcun kan hmuhning a dik hmasa a hau. Pumtlamtlinglo hna i an pumpak sining (identity) kha cherhchan in bawmhnak pek si loin an thilsining tonmi (Condition) in an luat khawhnak hnga kan bawmhchan hna a ṭha deuh.
Biakilh: Pumtlamtlinglo hna caah riantuanmi pakhat nih a hmuhning a tialmi a si, Chinland Post hmuhning a si lo. ~Editor
About The Author
