IBC Khrihfabu Nih Sing 30 Dih In Secular Lei Sianginn Kaimi Scholarship An Pek Hna Lai
IBC biakinn/Photo: TCP
Salai Cung Cung |2019 March 3| Hakha Immanuel Baptist Church (IBC) kumdongh meeting ah kumdang ah ceih bal lomi thil phunthum an ceih. Cu an ceihmi pathum lakah Ks. sing 30 dih in Secular lei sianginn kaimi hna Scholarship pek ding in biakhiahnak an tuah.
“Kumdang kan ceihbal lomi tukum ah thil pathum kan ceih. A pakhatnak cu Secular kaimi siangngakchia Scholarship pekding, pahnihnak cu institution kan remh (concentrative committee meeting) timi le a pathumnak cu Elementary Student Subsided Initiative (ESSI) timi ah saya-sayamah thlahlawh cheu pek ve ding tiah tukum ah kan ceih” tiah IBC Senior Pastor Rev. Lal Pek Lian nih The Chinland Post ah a chim.
“IBC Khirhfabu hi kum 33 a kal cang i Church Council meeting kan ngei kho bal lo. Tu hi member zong kan tamdeuh cang caah concentrative committee meeting tiin kan hun thlen. Hi Scholarship peknak kong ah hin ceihkhannak kan ngei rih lo, committee kan tuah lai. Tu cu Sing 30 in kan thawk lai i hmailei tu ah kan kai chin thluahmah lai. Cun scholarship zong hi pehzulh in kan tuah peng lai. Tu hi cu IBC chung lawng in si le hmailei ah cun Hakha College, Hakha GTI tibantuk le cun kawl lei zong ah siibawi kaimi tibantuk Line tha a kai mi paoh cu budang an si zong ah pek ding in timhtuahnak kan ngei. Hi scholarship sokning cu committee nih an tawlrel ning in sok si te lai” tiah a chimchap.
IBC khrihfabu nih nikum ah cheuhra cheukhat an i tinhmi cu Sing 1800 a si i ks. sing 2600 an hmuh. Tukum ah Sing 2500 an i tinh. Senior pastor thlahlawh hi nikum ah Kyat 445,000 a si i tukum ah ks. 505,000 ah a kai. Staff a niambik thlahhlawh hi 305,000 a si. Pastor le Staff zapi minung 13 an si. IBC khrihfabu cu Town Church in 1986 an rak chuak i tu hi member 2000 le inn 512 an si. 2019 kum Hakha khuapi chung khrihfabu senior pastor thlahlawh a sang bik cu IBC khrihfabu an si tiah kan theih.
About The Author
