ICBM Siangngakchia 73% Nih 2018-2019 Cacawnkum Tanghra An Awng

International Chin Baptist Mission/The Chinland Post

Salai Josephbawi| 2019 October 6| Chin Baptist Churches USA (CBCUSA) nih Chinram Pathian riantuannak le taksa thlarau thinlung in miphun kan thancho khawhnak hnga ca tiah International Chin Baptist Mission (ICBM) an thokmi chungin thlanglei Chinram siangngakchia zohkhenhnak an tuahmi 2018-19 cacawn kum ah siangngakchia tanghra a phimi minung 26 chungah minung 19(73%) nih tanghra an awng tiah kan theih.

ICBM nih Paletwa, Kanpetlet, Mindat, Gangaw le Rakhine ram um Chin mi sin mission riantuannak chung a ummi Chin siangngakchia hna cu zohkhenh cuahmah an si i nihin ni tiang Hakha ah tang 8-10 kar siangngakchia minung (75), Doctor minung pahnih-BE Engineer-International Relation tbk tel in University akai lio mi minung (31), Hakha CCU ah Bible siangngakchia minung (9), B.A Eng minung (2), MIT ah minung (1), Matupi um Union Theological College ah minung (3) an zohkhenh cuahmah hna tiah kan theih.

ICBM Tanghra a aungmi Thlacampiaknak/ The Chinland Post October 6, 2019

ICBM siangngakchia le timtuahmi kong The Chinland Post biahalmi ah“2018-19 cacawn kum ah minung 26 nih an phi i 19 (73%) nih an kan awnpiak. Distinction pakhat veve a ngahmi minung pahnih an itel. ICBM siangngakchia kan lak tik ahhin biaknak thleidannak kan ngei lo. Buddhist a aungmi minung 1 le akailiomi minung (2) zong an itel ko. Chin an si paoh ahcun Buddhist asibu in Chin hruaitu, santlaimi a si kha kan duhmi a si. Kan mission riantuannak a simi Paletwa, Kanpetlet, Mindat, Gangaw le Rakhine ram a ummi Chin a simi paoh kan cohlan hna. Hmailei Chin ram le Chin miphun nih bochanmi hruaitu tha, uktu tha, mifimthiam tampi an chuah khawhnak caah hi bantuk in kan tuahmi a si. Hmailei ramhruaitu hna an si te tikah ah Chinmi inaihniam in kan cawlcangh khawhnak hnga Laica zong kan chimh hna. Anmah hrimhrim nih Laica cawn an duh tuk i tha atho ngaingai. Cozah riantuan zong hi Chin si dih usih, Pathian ramkauhnak ca zongah hmanrua si usih tihi kan duh” tiah ICBM Myanmar Director Rev. Thla Tin Thang nih a chim.

“ICBM siangngakchia akaimi hna cu an sianginnkainak an thutdirnak dihlak bawmchan an si. Hakha siangngakchia dihlak kumkhat ca lawngah Kawlram tangka sing (1000) tluk kan dih. ICBM siangngakchia kan lakmi hna hi tha tein vatlawn in interview a ongmi lawng lak an si. Kan lak cangmi hna cu sianginn an dih tiang kan zoh hna lai timi policy kan ngei. Nikum a ongmi he cun minung 50 leng an si cang” tiah a biapeh ah a chim.

“Chin hi kan niam hrim lo. Ahlan Falam siizung hna zoh ahcun Kawlrawn lei in an rak kai i sii an itlop tiah ka rak theihbal. Vice President zong kan tuan cuahmah ko. Dr. Sasa zong nih Chinram ah ramdang mi tiang sii itlop kho dingin a timtuahnak a chimmi ka theih i a si kho taktakmi a si, hmailei kong aho hmanh nih kan chim kho lo. Ahlan Paletwa ahcun tang 8, tang 10 awn tihi kan rak iharhtuk. Kan thim lo maw ti ahcun kan thiamlo kha silo in cachimtu saya/mah kan chambau caah a si. Atu bantuk Biaknak lei in nan van cawlcanghmi hi Cozah hmanh nih kan in tluk bak hna lo. Hmailei hi bantuk tuan khawhnak le bawmh khawhnak lam a um ahcun kan izuam ve lai” tiah Municipal Minister Soe Thet nih ICBM siangngakchia thlacampiaknak ah a chim.

Paletwa cu fimcawnnak le kakip in kan har tuk hringhran. A ruang tampi ruangah sianginn a kai kho lomi an tamtuk. A tu bantuk in ICBM nih sii le ai, eidin dihlak in an kan zohkhenh tikah ka nu le pa zohkhenhnak hmanh in a tha deuh ti zong khin ka ruat. Hika ahhin thlanglei unau kip he kan thutdir ti tik ah ka lawm, ka nuam tuk. Siibawi lei Engineer lei a kai kho mi kan u le tiang an um I ka uangthlartuk” tiah tukum 2019  tanghra a aung mi Salai Pan Heih (Paletwa) nih The Chinland Post ah a chim.

ICBM 2019 Tanghra Awngmi Minung 19 Thlacampiak lio/ The Chinland Post

2018-2019 ICBM tanghra a ongmi hna thlacampiaknak cu October 6, 2019 HBA Hall, Hakha ah tuah a si i CBCUSA lei in General Secretary Rev. Dr. Thlaawr Bawihrin, Mission Director Rev. Dr. Van Thawng Lian, ICBM Myanmar Director Rev. Thla Tin Thang, International Chin Baptist Mission (ICBM), CACC GS Rev. Dr. Za That le biaknak lei sawmmi upa hna, Cozah Vuanci lei in Municipal minister U Soe Thet, Lam le Sul minister Pu Sui Thio, Social minister Pau Lun Min Thang, Hluttaw speaker Pu Zo Bawi le sawmmi upa tampi an kai hna.

ICBM cu July 13, 2013 ah Chin Baptist Churches USA (CBCUSA) nih Pathian sinah pekchanhnak a ngeih hnu ah Thlang Chinram Paletwa, Kanpetlet, Mindat le Rakhine ram, Gangaw peng hna ah mission a thok cuahmah cang. ICBM cu Paletwa Baptist Association (PBA), Kanpetlet Township Baptist Association (KTBA), Mindat Township Baptist Association (MTBA),Gangaw Baptist Association (GBA) le Rakhine fields (5) ah mission field director minung (5), ICBM Myanmar Director (1) le missionary minung (98) he rian a tuan cuahmah lio a si.   Hi ICBC riantuannak ah CBCUSA lawng silo in Norway, Denmark, New Zealand, Australia, India, Malaysia tbk ram dangdang ummi Chin Khrihfabu le chungkhar hna zong ICBM riantuannak ah hin an i tel i an bawmh hna tiah kan theih. International Chin Baptist Mission (ICBM) cu CCOC Second Round tiah minput in mission riantuannak thok ding ti rak chim a si nain Chin Baptist Convention (CBC) nih a min an sianh deuhlo caah ICBM tiah an hman thannak hi a si. Chin Baptist Convention(CBC) he tha tein chonbiak hnu ah July 1, 2013 thok in Kanpalet, Mindat, Paletwa, le Gangaw peng ah zalong tein rian an tuan cuahmah hi a si.

Leave a Commnet

%d bloggers like this: