India-Myanmar Ramri Ah Mine Bomb Lamh Sualnak In Pi Khusomai A Thi

0

Chinland Post| 2018 January 22| India-Myanmar ramri, Mizoram- Lawngtlai peng ah vawlei chung phummi mine bomb lamh sualnak in Kawnkhua khuami nu Pi Khusomai a thi.

Kum 37 a simi Kankhua khuami Pi Khusomai cu January 18 zingka, ramlak ah makphek lawhding in a kal pah ah vawlei chung phummi mine bomb aa lamh sual. A tai taang fakpi in a hnorsuan ruang ah January 19 ah a thi tiah Mizoram nitin chuak The Aizawl Post thanhca nih a langhter.

A thimi nu cu a pasal Nbauh Krauhha he fanu 4 a ngeimi a si. A fanu hniangbik hi a thla lawng a si rih, kumkhat hmanh a tling rih lo tiah theih a si. Atu bantuk in Lawngtlai peng ah hmanhmi mine bomb i lamh sualnak hi voihnih a si cang. A voikhatnak cu January 15, Burdukabanga khuami kum 26- Jitua Tongchangya cu ramlak i eidin tirawl a kawl lio ah mine bomb aa lamh ve sual i fakpi in hliamhma a tuar.

2017 kumdongh thawk in Myanmar ralkap le Rakhine ralkap (AA) kar i kahdohnak le buainak a chuah ruang ah Mizoram, Lawngtlai peng ah ralzaam a phanmi Chin miphun 1500 ringlo an um. Atu bantuk in an i lamh sualmi bomb hi Myanmar ralkap le Rakhine ralkap nih an hmanhmi mine bomb a si kho tiah theih a si.

Atu lio Lawngtlai peng chung ah khuami pawl nun himnak a um lo tiah theih a si. A ruang cu 2017 November 25 ah Myanmar ralkap le Rakhine ralkap an i kah ruang ah Tuichawngtlang khuami Robichondro cu meithal in an kah. 2018 January 12 zong ah Sabualtlang khuami Monodo timi cu tupung ah an rel i Myanmar ralkap nih meithal in an kah ruang ah hliamhma fakpi a tuar. January 15 zong ah Burdukbanga khuami Jitua Tongchongya zong an hmanhmi mine bomb aa lamh sual caah fakpi in hliamhma a tuar.

Hi hmun hrawng ah khua a sami mizapi cu a biapi in tlanglo rian in paw aa cawmmi an si. Cucaah, atu bantuk thil a cangmi rian rang in tawlrel a herh. Cu lo ahcun tlanglo an kal ngam ti lai lo i caan a rauh tikah cun eidin kan ngei ti lai lo tiah khuami hna nih The Aizawl Post ah an chim.

Ref: Khonumthung Burmese

About The Author

Na ruahning rak langhter ve.. (Leave a comment)

%d bloggers like this: