India Nih Kumkhat Ah US$ 5 Million In Kumthum Chung Chinram A Bawmh Lai
TCP-Hakha| 2018 November 21| Chin ramkulh, fimcawnnak, ngandamnak le lam le sul thanchoternak ding hman awk caah India cozah nih kumkhat ah US $ 5 million lengmang in kumthum chung a bawmh lai tiah Chin ramkulh chimnak nawlngeitu Sipin Minister U Soe Htet sin in kan theih.
Sipin Minister U Soe Htet nih, “India Ambassador nih, tukum thawk in kumthum chung Chinram thanchonak caah US $ 5 million lengmang kan in bawmh hna lai a kan ti. Paletwa le Mizoram pehtlaihnak ding tlanglam 109.2 kilometer cawh dingmi zong 60 kilometer tiang a hranpi cu kan cawh cang. A taangmi vialte zong hi kumhnih le cheu chung ah kan cawh dih lai i concrete (nylon kat-ta-ya) kan phah dih lai. Atu an cawh cangmi tlanglam hi Paletwa tilawng dinhmun in aa thawk” tiah The Chinland Post ah a chim.
India Ambassador H.E. Mr. Vickram Misri le Consul General Dr. Kumar Paraveen cu November 20 ah Chin ramkulh Hakha an phan. November 21 zingka Chin ramkulh cozah bu he ton biaruahnak an ngeih lio ah India Ambassador H.E. Mr. Vickram Misri nih Chin ramkulh cozah sin ah atu bantuk in a chim hi a si.
“Chinram ramri gate, chawlehthalnak le hlei pawl standard ngeite in thanchoter deuh ding, Chin ramkulh lam le sul thanchoter deuh ding, fimcawnnak le ngandamnak lei bawmhchanh ding, fimcawnnak sianginn pawl sakpiak ding, cun fimcawnnak le ngandamnak he aa pehtlaimi a bik in rian hmuhnak tibantuk tuahpiak ding, Chin ramkulh cinthlaknak le zuatkhalhnak lei thanchoter ding le Chinmi nih pawcawmnak rian thiamnak ding vocational training tibantuk tampi tuahpiak kan in zuam hna lai ti in India Ambassador nih a kan ti” tiah Minister U Soe Htet nih a biapeh ah a chimchih.
Cu pin ah Chin ramkulh ramri gate a simi Rihkhawdar le Cikha ramri chawlehthalnak sakhaan in chawlehthalnak rian thanchoter deuh ding le Paletwa in tilawng dinhnak zong kumhnih le cheu chung ah lim ding in an i zuam kong India Ambassador nihcun a chim tiah theih a si.
About The Author
