India nih SAC sin ah Drone telh in kherhlainak thilri a zorh; Ralhriam thatter an i zuam

Editor | 2021 June 17 — SAC Kawl Ralkap nih a si khawh chung in vawlei cung ah a sang bik mi thilri ‘Technology’ hmang kho ding in hriamhrai a zalh cuahmah. Cu a zalh cuahmah mi thil le ri, khawika in dah a cawk, aho sin in dah a zalh timi kong ah phorzarnak tuah a si.

Ramkomh Kawlram ah Nuhrin Covo puitling a um khawhnak hnga a cawlcang mi phu Justice for Myanmar nih felfai tein in chekfelnak an tuah mi in an langhter mi in hmuh khawh a si.

Feb. 1 hnu ah, a tlawm bik [India in] voi sarih tluk thilri an phorh mi hmuh khawh a si. A bik in, an phorh mi hi a cunglei in ngiathlainak (radar components) deuh lawngte an si tiah theih a si.

Atu ah, India cozah nih a ngeih mi raltuknak hriamhrai sernak company ‘Bharat Electronic Limited (BEL)’ nih, SAC Kawl Ralkap sin ah ngiatthlainak thilri ‘Radar Technology’ hramhram in nawlngeihnak an lak timh (Feb. 1) hnu ah a zorh tiah Nuhrin Covo caah cawlcang mi phu Justice for Myanmar (JM) nih report an chuah tiah Aljazeera 101 East nih a thanh.

Justice for Myanmar nih, “hlathlainak le felfai tein zohfelnak an tuah mi chung in a luan cia mi Feb. 1 hnu ah, India cozah ngeih mi company nih Kawlram lei ah a tlawm bik hriamhrai le thilri cu voisarih (7) tluk an rak phorh,” tiah thanh nak a tuah.

India cozah ngeihmi company hi Europe lei in Pintit/Holland (French/Dutch) nih an bawmh mi le anmah he pehtlai in riantuan timi an si ruang ah Europe nih Kawlram kong he pehtlai in hriamhrai zuarh lo ding timi nawl a bur khawh tiah phozarnak an tuah mi ah an langhter.

“Atu bantuk in, India siseh a dangdang ram zong nih a hlan in an i pehtlaihnak ruang ah hriam thatha an ngeih cang. Cucaah, atu lio kan naule Ral a tu mi hna nih an theih ding a biapi ngai mi cu, Ral an tuk nak ah an mobile phone an hman mi hi a si. Mobile phone an hman ahcun, Radar/Drone nih fawite in an umnak, an bawhnak hna hi an theih khawh mi hna a si” covo lei a cawlcang mi upa pakhat nih a chim.

Aljazeera 101 East nih, biaruahnak an ngeih mi nu nih a chim ning cu hitin a si;

“Kan hmuhmi cu hitin a si. A tlawm bik Nitlak lei he pehtlai mi company 40 tluk nih hin, ral hriam lei thilri hi an zorh. An zorh mi thilri pawl cu ngiathlai nak he a pehtlai mi lawngte an si. A bik in, atulio Myanmar caah a biapi mi lawngte an si,”.

Kawlram lei ah an zorh mi thilri chung ahhin, “telephone an i chonh lio i, Ngiatthlai khawhnak seh, cakuat rel khawhnak, mi password hrawh khawhnak thilri tbk a tel tiah theih a si. Hihi a luan cia mi kum 2, kum 3 khan a rak i timhlamh peng mi cu a si….”

Telephone chonh mi ngiathlai khawhnak he pehtlai in, thawngpang a rak chuak bal cang, asinain, SAC Ralkap nih anmah nih tawlrel mi a si lo. NLD cozah nih an rak timhlamh cia mi a si cang tiah nawlngeihnak hramhram in an lak thawkka ah an rak chim cang. #

Na ruahning rak langhter ve.. (Leave a comment)

%d bloggers like this: