India phan ralzam 39,150 chung ah 3,197 nih UNHCR sin ah humhimnak an hal
Delhi ah Chin miphun nih duhlonak lamzawh lio, Photo: Salai Cung Dawt (FB)
The Chinland Post | 2022 May 9 — Ramkomh Kawlram buaibainak ruang ah India ram ah a zam i a phanmi dihlak hi 39,150 an phan cang tiah UNHCR nih May 4 ah thanhnak a tuah.
Cuchung ah, a tlawm bik 3,197 hi UNHCR Delhi zung ah an kal i, Ralzam (refugee sinak) an hal, UNHCR sin ah pehtlaihnak an kan tuah tiah UNHCR nih thla fatin an chuahmi ripawt in theih a si.
Hi ralzam chung in UNHCR Delhi sin ah pehtlaihnak a tuahmi ahhin, 298 cu kum tling lo an si tiah UNHCR nih a langter.
UNHCR ripawt chuahmi ning ah, Ralzam a tam deuh hi Mizoram ah an um. Zatuak 65 (%) tluk hi Mizoram i khuate ah siseh, chungkhat sinah siseh, hawikom sin ah an um i, a dang zatuak 35 (%) tluk hi khuami le cozah nih bawmhnak in sermi ralzam dornak hmun ah an um tiah theih a si.
Atu bantuk in, Chin miphun le a dang Kawlram mi pawl nih Mizoram ah zalong tein dornak a petu hi miphun le unau tanhnak lungthin a ngeimi central nih a hruaimi party a silo mi Mizo National Front (MNF) an si caah a si tiah central cozah New Delhi khuaruahning a theihmi nih cun, an ruahnak le hmuhning an chim.
UNHCR Delhi nih an si khawh chung in an izuamnak le riantuanti phu simi BOSCO tbk. he ralzaam caah an cawlcanghnak an langhter. UNHCR nih cun, Ralzam a rak phanmi kum tling lo nih hin, kanmah telawng in kan rak ra, chungkhat le cingla sin ah kan i benh tiah an chim timi zong a langhter chih fawn.
Nihin tiang ah Ramkomh Kawlram pumpi ahhin, Ralzam 937,000 tluk um a si cang i, cuchung ah 590,000 hi February 1 Ralkap nih hramhram nawlngeihnak lak hnu in a zaammi an si. Cun, 59,000 tluk hi Innpa ram a simi Thailand le India ah a zaami an si, tiah UNHCR nih cun a langhter.
Atu bantuk in, UNHCR Delhi zung ah Ralzam sinak (refugee status) halnak kong he pehtlai in, Ralzam dirkamhnak ah caan saupi a cawlcangmi nih, humhimnak tiang a simi RSD card (refugee sinak card) tiang cu an pek zong an pek ko men hna lai, nain Ramdang lanhnak bel hi cu a har lai dah, a ruang cu Delhi ah caan saupi a hngak cangmi hna le UN le Embassy nih kal ding na si cang tiah an timi tampi zong nihin tiang ah India cozah nih chuahnak nawl (exit permit) a pe duh hna lo tiah an hmuhning The Chinland Post ah an langhter. Asinain, UNHCR nih, humhimnak a pek hna ahcun, cucu lawmh bik ding cu a si ko tiah an lungum an pehchap.
