India-Kawlram Pehtlaihnak Lam Phih Mi YLA Nih Pehzulh In An Rengh

0

TCP-Thantlang| 22 April 2020| Atu lio zawtnak COVID-19 ruangah India le Kawlram pehtlaihnak lam hmun kip Mizo ram Cozah nih phih khar mi cu Young Lai Association (YLA) nih peh zulh in an rengh chinchin tiah theih a si.

COVID-19 zawtnak lak ah kan him khawh nak hnga caah tiin pehtlaih nak lam a si mi, Ralven chuak, Zukpul, Saisihchuak, Fungsih, Hmunchungchuak, Tlangerhchuak, Archuang kai le hmun dangdang hna cu phih in a hmun ah mi ngiathlai tu minung riah (duty) ter an si hna. Mah pin ah  YLA hruaitu upa hna zong an mah thazaang chuah in hmun kip ah riah in lam cu an ven pi hna pin ah an ei din   tawlrel piak le thazaang peknak an ngeih hna.

Lam an kham ning (Photo: LFG)

Pehtlaihnak lam hmun ah a riak mi hna caah Mizoram khua cheukhat le Branch  cio hna nih eiding le mehhang lei in an bawmh ve cio hna. A si nain Mizoram palik hna nih hmun kip ah an riah pi khawh hna lo caah le zaanghlei cawi in a riak mi hna zong riantuan chom tein, inn chungkhar a cawm mi zong an si ve caah hi rian cu Cozah nih fak pi in an bawmh chanh hna i thazaang pek an hauh nak kong YLA tuanvo ngeitu pakhat nih a langhter.

Pehtlaihnak Lam ah Catar mi (Photo: LFG)

Kawl ram le Chin ram chungah a tu lio zawtnak a karh lei a panh chin lengmang caah pehtlaihnak lam Duty hi a herh tuk mi zong a si. Cucaah a Duty mi hna zong hi Khua le ram caah dawtnak le zawnruahnak he a hngak mi an si caah mizapi nih kan theih thiam piak hna i a lam kip in kan bawmhchanh hna ding kan rian a si tiah a chimchap.

Zan an ihnak hmunhma cheukhat (photo:LFG)

India- Kawlram pehtlaihnak lam hna cu Mizo ram YLA le tuanvo ngeitu hna nih March 23 ni ah ramri kip ah riah in  venhimnak an tuah (an Duty) cang. Hi lam phihnak kong cu YLA nih Chin ram kulh, Hakha holh in thawngthanh ca (Daily News) sin zongah theih ter le thawngthanh nak an rak tuah cang mi zong a si. (Ref: Lawngtlai Future Group/ Translate: Salai Elvis)

About The Author

Na ruahning rak langhter ve.. (Leave a comment)

%d bloggers like this: