Indiana Ah Naga Paih Pathumnak Le Paih Dawhbik Laksawng A Cotu Rung Lian Ceu An Don

TCP-Hakha| 2019 March 15|India ram, Naga paih ah pathumnak le paih dawhbik laksawng a cotu Rung Lian Ceu cu March 14 zantim suimilam 12:00 tluk ah Indiana vanlawng tual ah Chinmi nih an don tiah kan theih.

Paih thawng Rung Lian Ceu, WPC haotu Pu Ang Cung le Pastor Tin Za Peng cu Naga paih an kalnak in US lei ah an kir. March 14 zantim ah Indianapolis vanlawng tual an phan i Indy kha upa, khua mino, WPC, CYO, CHS le Vanmi Productions nih aiport ah an don hna. Hika ah an don  lio hna Vanmi Production nih live a thlahmi video zoh khawh a si.

 

March 7, India ram, Nagaland State khualipi Kohima ah tuahmi avoi 12nak Naga Open Wrestling paih ah Chinmi 5 telh in minung 62 an i pai. Hi zuamcawh paih ah Rung Lian Ceu nih pathumnak laksawng Rs. 100,000 (Kyats 2,000,000) le paih dawhbik laksawng Rs. 10,000 (Kyats 200,000) a co.

Tutan Nagaland an i paihmi hi Chinmi nih a hmasa bik miphun dang le ramdang sin ah kan i paih a si. Rung Lian Ceu nih champion a co lo nain Naga miphun thinlung  ah Rung Lian Ceu hmunhma a la kho bik. Champion a cotu pa nak zong in amah thapetu le a uartu an tamdeuh. Amah aa paih caan paoh ah a zohtu thinlung a thangh in a hip khawh tuk hna caah daite in an zoh kho lo, amah min lawngte an au tiah kan theih.

Rung Lian Ceu nih Naga paih in laksawng a comi zapi CNF le midang a hlut a dih hna. CNF sin ah Rs. 60, Hakha lei in a rami sin ah Rs. 10,000, Delhi lei in a rami sin ah Rs. 30,000, paih dawh bik laksawng  a comi Rs. 10,000 zong aa pai vemi Hrang Tin Thang a thenh dih. Hi pin ah mah pumpak tangka Rs. 10,000 zong Delhi Chin Community a hlut hna tiah kan theih.

Rung Lian Ceu hi voi 15 tluk aa paih chung ah voi 12 champion a co cangmi a si.

Photo: CHS club facebook

Leave a Commnet

%d bloggers like this: