Indonesia Thimnak Ah Riantuantu le Palek 100 Renglo An Thi
TCP-Hakha| 2019 April 25| Indonesia thimnak ah meezung riantuantu le palek phu lutlai 100 renglo an thi. Thimnak i riantuantu 500 renglo an thabat tuk ruang ah an zaw tiah Indonesia thimnak commission facebook page cahmai nih April 23 ah a thanh.
Indonesia thimnak ah meezung 800,000 renglo a um i meezung riantuantu telh in thimnak kongkau rian ngeitu zapi nuai 6 renglo an si.
Nitlak Java ah 38 an thi i a thimi tambiknak hmun a si. Cu bantuk in alaifang Java ah minung 20 le nichuah Java ah minung 14 an thi. Hmun dangdang i riantuantu hna zong a thimi an um. Madiun meezung ah riantuanmi thlasarih fa a pawi liomi kum 39 nu zong a nau aa rawk i atu hi an thlop liopi a si.
Bloomberg media thanhning ah Indonesia thimnak caah riantuan liomi a thimi zapi hi April 24 ahcun minung 139 tiang an phan cang, an retheih thabat tuk ruang ah an thi tiah theih a si.
April 17 ah tuahmi Indonesia thimnak cu nikhat te lawng ah mee pekmi thimnak lakah a ngan bik a si. Mee pe khotu zapi nuai 193 an si i zatuak 81% nih mee an pek tiah a langhter.
Thimfung an rel liopi a si i atu tiang an relmi le a fek rih lomi mee result ning ah atu lio President Joko Widodo nih amah zuamcawh pa ralkap bawihlun Prabowo Subianto cu a tei rih theih a si.
Ralkap bawihlun Prabowo hi 2014 kum thimnak ah atu lio President Joko nih mee tlawmte in a rak tei. President Joko nih thimnak ah riantuan liomi an thihmi cung ah a ngaihchiatnak kong social media ah a thanh.
Ref: Duwun
About The Author
