Inn Hmun A Ngah Cangmi Chinram Cozah Phu Meeting Nih Fehter A Si Hlan Chung Paoh A Fekmi A Si Rih Lo
Salai Ngun San Aung| 2018 February 24| Hakha sangthar samhmi ah mee zuhnak he inn hmun 200 a ngah mi hna hi Chinram cozah phu nih zohfelnak a ngeih rih hlan ahcun a man kong zong a fiang rih lo i nai tan mee a zuk i a ngah mi hna an ta a si nak zong a fek rih lo tiah tuanvo ngei sipin committee sin in kan theih.
“Nai tan ah minung 800 fai nih mee an zuh i inn hmun 200 an ngah. Asinain cu a ngah mi hna cu cozah phu nih an zohfel than lai, an ceih i cohlan a si hnu lawng ah anmah inn hmun sinak catlap pawl tawlrelpiak le inn saknak nawl tibantuk chuahpiak an si te lai. Cu hnu lawng ah a man kong zong a fiang lai. Cozah phu nih a fehter mi paoh kha pengkomh uknak zung kut ah kan pek dih lai. Vawlei tahnak zung nih an tah lai. Cu hnu ah inn hmun license an pek hna lai cun sipin nih inn saknak nawl a chuahpiak hna lai. Cu hnu lawng ah cun inn sak khawh a si te lai. Inn hmun man hi kanmah committee le khuanu khuapa lei in ruahnak pahnih kan chuahpi. Inn hmun hi phun thum ah kan then i cu ning cun a man kong ruahnak kan chuahpi. Sing hra, sing sarih le sing nga tiin phun thum then mi cu a man khiah ding timi ruahnak pakhat. Cun sing sarih, sing nga le sing thum siseh tiin ruahnak dang pakhat a um. Hi a man kan khiah mi hi cozah phu nih an zoh lai i aa tlak deuh an timi an fehter te lai. Hi ti inn hmun man kan ti nak a ruang cu sang thar samhmi chung ahhin luti luannak zong tuah a hau, mei tung, yeepun le hlei tibantuk zong tuah awk a tam pi. Tu khi lam pe 40 kau in kan cawh i khi cawh nak lawng hmanh ah khin sing 1000 leng kan dih cang” tiah Sipin Committee Pu Ngun Vung nih a chim.
Mee a zuk i inn hmun a ngah mi nih kan inn hmun zoh ding in kan va kal tikah inn hmun ah number zeihmanh an rak bunh lo. Number ning in mee an kan zuh ter fawn tikah hihi hlenrawinak hna a um sual hnga maw ti kan ruat. Felfai tein number khenh dih hnu ah mee zuh sisehlaw kan ngah ni in kan inn hmun i hngal usilaw lungtling a si hnga. A tu cu kan inn hmun kan i hngalh lo tikah an duh mi le tangka tam deuh a pe kho ding paoh hmun tha pek khawh ding bantuk hna a lo tiah innhmun co ding in mee a zuktu hna nih an chim.
Hi kong ah sipin committee lei in tuanvo ngeitu nih, “Inn hmun number hi kan rak khenh cia dih ko. Asinain lam kha a thawk ah pe 20 kau lawng in kan rak cawh. Cucu a bi deuh ti a si caah pe 40 in kan kauh chap. Cu nih cun hmun umtuning zong a sersual deuh leng ah number kan khenhmi tete zong kha leivawr nih a chilh dih hna. Cun kan ruah ning caan chung ah lam cawh kan lim kho lo, mee zuh ding ah le cu tik ah tiah mizapi sinah kan thanh cang fawn tikah rian kan lim hlan deuh in mee an zuh ruang ah a si. Zeihmanh lunghrinhnak kan ngei hrimhrim hna hlah seh. Kanmah nih computer chung ah inn hmun pawl cu meepung le number he tha tein kan chiah dih ko i cu meepung le number cu rak zoh khawh zong a si ko” tiah an chim.
Sangthar samh mi cu December 12 in soknak catlap an cohlan i January 12 tiang sok caan a si. Hi chung ah minung 1090 fai nih an sok i cu chung in mee zuk ding ah cohlan mi 810 an si. Cu mee a zuk ding cazin cu January 30 in mizapi sinah an thanh i February 7 tiang ni sarih chung hi thimmi cazin ah inn a ngei mi ti bantuk mizapi leikap in lungtlin lomi a um sual ah duhlonak kong chim khawh a si tiah caan an on. Mi zei hmanh nih duh lonak chim a si lo tikah February 14 ah cu minung 810 nih cun Hakha Town Hall ah mee an zuh. Cu chung in inn hmun 200 a ngah mi hna cazin cu committee nih Chinram cozah phu ah an pek cang i a nai bik cabinet meeting nih a ceih lai. Cabinet nih a fehter hnu ah tuanvo ngei nih a dotdot in inn hmun a ngahtu pawl phung ning tein an ta sinak an tuahpiak cang hna lai.
About The Author
