Innchung erh ni 14 a tlin hlan ah Matupi a kalmi US tlung pahnih thong an thlak hna

0

|The Chinland Post – April 9, 2020| US ram in Kawlram lei, Gangaw khua a phanmi minung pahnih cu innchung erh (home quarantine) ni 14 an tuah hna nain a tlin hlan ah Matupi lei an kal caah Gangaw biaceihzung nih thong thla thum veve an thlak hna tiah theih a si.

Magway ramthen in Chief Minister nih thawngthanhnak a chuahmi ah US in a rak phan mi Sipin sang, Gangaw khua ah aa thum mi Pu Tin Za Mang (apa min Pu Paih Ling) le Kyawtaih Sang, Gangaw khua aa thummi Pu San Zaw Oo (a pa min Pu Bawi Thawng) hna cu ramthen cozah nih Covid-19 vennak kong nawlchuah mi ngaih lo in “innchung ni 14 erhding an zulh lo” caah Magway ramthen biaceihnak zung nih chawnh khawh zawtnak vennak le dohnak phung (ကူးစက္ေရာဂါမ်ား ကာကြယ္ႏိွမ္နင္းေရး ဥပေဒ) ning in April 6 ah thong thla thum veve thlak ding in bia a khiah tiah thanhnak a tuah.

“Anmah pahnih hi America rammi sinak aa tlaihmi an si. Ni 14 chung innchung erhding in timhpiak an si nain ni 4, ni 5 lawng an i erh i nawl zul lo in Matupi lei an tli. Matupi an phanh in Matupi peng uktu le tuanvo ngeitu in an tlaih hna i Gangaw lei an rak kuat hna. Cu hnu ah Gangaw in biaceihnak zung nih thla thum veve thong thlak ding in bia a chahpiak hna hi a si,” tiah palek pakhat nih Chin World Media ah a chim.

US in a rak tlungmi Chin pa pakhat zong Tamu ah cozah khamh bu in nupi thitnak puai a tuah caah taza an cuai i, tangka sing 10 le thong thlak ding, cun a tlunnak apa zong Lawaka upadi in sing 10 dan an tat ve tiah theih a si.

Cu ve bantuk in Hakha zong ah Australia in a rak tlungmi pakhat zong mipi pumkhawmh in thawngtha chimnak a tuah caah cozah nih amah he a tlunnak inn ngeitu he taza an cuai hna lio a si tiah kan theih.

About The Author

Na ruahning rak langhter ve.. (Leave a comment)

%d bloggers like this: