Innhmun Pekmi Thla 6 Ah A Sa Lomi Paoh Chuh An Si Cang Lai Tiah Chinram Cozah Nih Nawl An Chuah

TCP-Hakha| 2017 August 3_Repost| Inn hmun pekmi le innsaknak nawl pekmi thla 6 chung ah a sa lomi paoh a herhning in dantat le chuh an si cang lai tiah Chinram cozah nih nawl an chuah.

Hi pehtlai in Hakha penguk lutlai Pu Chan Fiang nih, “cozah nih vawlei cazin musiam 105/106 pekmi siseh, innsak, lo, dum tuahnak caah vawlei hlanhnak gram pekmi sachoh a ngeimi si hna seh, dum tuah lo, lo tuah lo, inn sa lo in buar pi in a chia sawhsawhmi paoh cu Chinram cozah nih chuh an si cang lai. Vawlei hmun an hal lio le vawlei hlanhnak sachoh gram pek lio ah a tanglei te ah cu ningte cun na tuah lai timi chingchiahnak ca tialpiak chih lengmang an si. Atu cu 105/106 le vawlei gram a ngeilomi paoh nih 2017 August 3 thawk in thlathum chung ah zung ah pehtlaihnak rak tuah cio ulaw thla 6 chung i nan sak ahcun aho hmanh chuh nan si lai lo” tiah The Chinland Post ah a chim.

Hi kong he pehtlai in Chinram cozah nihcun, “Chinram chung kokek rawhralnak ton ruang ah hmunhma pek a herhmi, tihnung hmun ah a ummi hna himnak hmun thial le hmunhma pek an herh caah cozah nih vawlei hmun pekmi, vawlei cazin muisam 105/106 phungningte in tuahpiakmi le vawlei hlanhnak gram (vawlei hlanhnak sachoh) a ngeimi paoh nih zulhphung ning in vawlei a hmang lomi le inn a sa lomi paoh cu upadi he aa tlak in hrawhpiak le vawlei hmun chuh an si cang lai tiah ralrinpeknak cathanh an chuah”.

“Cozah zungkip an si ah, pumpek le company pawl an si ah vawlei ngeihnak muisam 105/106 phungningte in a ngei cangmi paoh nih siseh, vawlei hlanhnak gram (sachoh) a ngei cangmi paoh nih atu nawl kan chuah nit hawk in thlathum chung ah pengkomh le penguk zung ah vawlei hmun ngeihnak catlap le tette he pehtlaihnak tuahding. Cun, cozah nih phungningte in 105/106 pekmi le vawlei hlanhnak gram pekmi a ngeitu paoh nih hi nawl an chuah nit hawk in thlaruk chung ah inn a sa lomi asiloah sokning bantuk in vawlei a hmang lomi paoh upadi ning in cozah nih chuh nan si cang lai” tiah an tialchih.

“A cunglei ning in nawl a zul lomi le a tuah lomi paoh cu kokek rawhralnak ruang ah hmunhma pek a herhmi, tihnung hmun ah khua a sami, a hung thangchomi innchungkhar, milu le aa tlak in vawlei hmun pek a haumi pawl hmunhma peknak caah Upper Myanmar vawlei le ngunkhuai ni-upadi ning in vawlei hmun chuh nan si cang lai” tiah Chinram cozah nawlchuahmi ah cun an tialchih.

Hakha penguk Pu Chan Fiang nihcun, “tu lio ah ka aipuang bikmi cu innhmun aa laak tung i inn sak lo le dum tuah lo in buar nawnpi innhmun a chiahmi pawl hi an si. A cheukhat cu hmun ngeitu minung umnak hngalh lomi le pehtlaihnak zong tuah khawh ti lomi an tamtuk” tiah a chimchih. +++

Na ruahning rak langhter ve.. (Leave a comment)

%d bloggers like this: