IQ le EQ

Salai Van Biak Thang — IQ kan timi cu ‘Intelligence Quotient’ i a tawinak a si i minung pakhat i kan thluak sining le thazaang tahnak i an hmanmi a si. Cacawnnak lei i tah ahcun cathiamnak thluak a thawn le a der tahnak phun khat a si.

EQ kan timi cu ‘Emotional Quotient’ i a tawinak a si i ‘Emotional Intelligence’ tiin atu lio ahcun theih deuh a si. Minung pakhat i mah tein thil theih khawhnak, tuaktan khawhnak le midang sining zong theih khawhnak khi a si.

IQ cu Mirang holh in ‘book smarts’ ti zongin an ti. Cacawnnak, sianginn asiloah cawnthiamnak ah a thiammi minung kha a sawh duhmi a si. EQ cu ‘street smarts’ tiah an ti i lamcung le zatlang thil sining kha zoh chih in hmuhtonnak a hmang thiammi minung kha a sawh duh. Phundang in kan chim than ahcun IQ minung nihcun cauk kha an i chirhchan i EQ nihcun hmuhtonmi kha aa chirhchan.

IQ pawl cu an thiamnak hmangin rian tampi a tuan khomi an si, nain midang hruainak le midang he riantuan tinak lei ah an der; EQ pawl nihcun kanmah sining le midang sining tuakchun in rian an tuan i an khuaruahning zong kha a phu (team) lei hoih in a si caah hruihruainak le a bu in riantuannak lei ah an thawng.

Zeidah a biapi deuh timi hi an i el lengmang. Minung kan hlawh a tlin khawhnak dingah kapkhat sining lawng kalpi loin a kapkap in thil hmuh thiam le tuah thiam hi a biapit caah IQ lei lawng ruat loin EQ lei zong thanter ve kha a biapi ko tiah an ruah. Tuchan kan dirhmun ah rian lawng thiam si loin a tuan dan le midang he tuan ti dan zong thiam a biapitnak kha IQ le EQ nih an langhtermi a si. – Salai Van Biak Thang

IBC Hakha nih zarhtin chuahmi ‘Fidi Cazual’ ah rak chuah cangmi a si. ~ Editor

Na ruahning rak langhter ve.. (Leave a comment)

%d bloggers like this: