Iran He Nuclear Kong Cahren Ngeihmi In US A Chuak

0

Salai Aung Aung| 2018 May 9| US President hlun Barack Obama nih a zungzal UN chungtel a simi, British, France, Russia le China lengah Germany he Iran Nuclear ser khamnak ding caah hnatlaknak cahren 2015 i an tuahmi in US kan chuak lai tiah May 8 ah President Donald Trump nih thawngthanhnak a tuah.

Hi lungtlinnak cahren hi rammi pakhat sinak in ka ning zong a zak tiah Trump nih a chim.

“Iran Nuclear lungtlinnak cahren chung in USA kan chuak lai tiah keimah nih nihin ka thanh. Nuclear kong ah Iran cozah cung i phihkhar dantatnak mumai tuahding mi President nawlpeknak catlap zong a rauh hlan ah min ka thut lai” tiah a chim.

Iran Nuclear lungtlin hnatlaknak cahren ahhin Nuclear ser nak caah a biapi ngaingai mi Uranium thiannak thli tlawm ter ding in hnatlaknak an ngeih caah Iran cung i chawlehthalnak lei phihkhar mi pawl cu UN, EU, USA le Tuluk nih an rak hun piak.

Iran President Hassan Rouhani nih cun US thawngthanhmi hi Iran nih kan ngeihmi zumhngamnak an upat lo a si tiah a leh. Cun kannih cun Iran Nuclear lungtlinnak cahren chungah kan um ko lai tiah a chim.

German, British, Russia, France le Tuluk bel cu lungtlinnak cahren chungah kan um rih ko lai an ti. Israel tu nih cun US thil tuahmi hi ka lungtlin pi a ti ve.

Trump hi cahren a tuah ve mi ram pawl nih bia zong an ruah i an lem chun ko nain cahren chungin a chuah lengah Iran cungah chawlehthalnak lei phihkhar nak zong ka tuah lai a ti caah Iran ah rian a tuanmi ramdang company pawl caah harnak tampi a um kho tiah thiamsang pawl nih an ruah.
Ref: BBC, VOA

About The Author

Na ruahning rak langhter ve.. (Leave a comment)

%d bloggers like this: