Italy Cawihmi Nuai 30 Euro In Chin Ramkulh Lam le Sul An Remh Lai
Salai SH Lian: 2018 August 5—Italy nih a karhlo in cawihmi Nuai (million) 30 Euro chung in Chin ramkulh pehtlaihnak Lam le Sul a tha lomi remhnak le sernak ah an hman lai tiah theih a si.
Italy nih Ramkomh Kawlram sin ah cawih dingmi tangka Nuai 30 Euro hi a karh (interest) a um lai lo. Zeihmanh a karh pek haulo in kum 18 chung hman hnu ah kum 10 chung ah cham than ding a si tiah Eleven Myanmar nih a tial.
A biapi in tuannak ding hmun cu Chin ramkulh Lam le Sul a tha lomi le a kiangkap pengkulh le ramkulh he pehtliahnak thatter ding a si lai tiah theih a si.
Union Minister for Agriculture, Livestock and Irrigation Dr Aung Thu nih Union Parliament ah tangka cawi dingmi kong a chuahpi mi chung in a si. Nuai (Million) US$ 40.5 hi Asia Development Bank sin in a si lai i, Nuai 30 Euro hi Italy cozah sin in a si lai.
Hihi Dr. Aung Thu nih August 1 ah Union Parliament ah a hal cang tiah theih a si.
ADB sin ah cawimi tangka hi kum 32 a rauh hnu ah cham than dingmi a si. ADB sin i cawimi tangka bel hi a karh pek dingmi a si.
ADB sin cawimi tangka in Lothlawhnak (agriculture project) ah an hman lai. a bik in, Magaway in khuapi 4 ah siseh, Mandalay in khuapi 4 ah siseh, Sagaing in khuapi 5 ah a si lai. Hihi kong ah ADB thiamhleisang le cozah riantuantu nih 2016 thawk in nihin tiang hlathlainak an tuah cangmi a si.
“ADB le Italy cozah sin in cawimi tangka hi cham a zat tik ahcun, a cozah tangka in a tlawm tete in cham a si te lai” Dr. Aung Thu nih a chim.
“Italy cozah nih cawih dingmi tangka hi anmah nih Ramkomh Kawlram thanchonak caah kan in bawmh hna lai tiah an kan timi a si. A bik in Rampumpi electric mei a ngah nak ding caah a si. Kawlram pumpi in mei ngah dih seh timi saduhthah he bawmh dingmi a si” tiah a chimchap.
Ramkomh Kawlram ahhin, khuate (villages) 63,899 a um i cuchung ah khuate 24,290 lawng mei an ngah. Khuate 39,609 tluk hi mei a ngei rihlomi an si tiah theih a si.
Nain, a karh um lo tein cawih dingmi Italy tangka in Chin ramkulh ahcun, Lam le Sul tu a hmaithlak lai tiah Eleven Myanmar nih cun a langhter.
Atulio ah, World Bank in International Development Association (IDA) cawihmi tangka in 2030 hlan ah Ramkomh Kawlram dihlak in mei tuah piak dih ding timhtuahnak an ngeih cuahmah lio a si. Cucu bawmhnak in atu ah, Khuate 1,019 chungkhar in 96,500 tluk nih inn hmanmi Solar (home-use solar panels) in mei an van khawh cang tiah theih a si.
Cun, World Bank bawmhnak thiam in Chin ramkulh khualipi Hakha in Kalay pehtlaihnak lampi caah bawmh dingmi zong timhtuahnak rak ngeih a si.
A bik in, Cyclone Komen 2015 ah a cangmi kotho rawhralnak (natural disasters) ruah le thichia ruang ah rawkralmi remhthannak caah tiah World Bank nih (Emergency Recovery Credit) bawmhnak Nuai US$ 60 (million) cu Chin ramkulh caah a rak pek. Cucu, Ramkomh Kawlram zapi caah Nuai US$ 200 a pekmi chung in a si.
Chin ramkulh bawmhnak pek ding ah an rak thimnak a ruang cu 2015 ah a fak bik in rawhralnak a tuarmi ramkulh a si caah a si.
Ref; Eleven Myanmar, ADB, World Bank, Mizzima
About The Author
