Japan Ah Thlahlawh Sing 25 Ngah Ding Alak In Riantuantu An Thlah Hna Lai
TCP-Hakha| 2019 January 17| Japan ram ah a hrampi thlahlawh ks. sing 25 (2,500,000) renglo ngah khawh dingmi rian ngahnak caah tanghra a awng i kum 25 tang tattoo aa tuah lomi paoh nih sok khawh a si tiah kan theih.
Japan ram in rian auhnak catlap cu aralaimi April thla chung i a phanh lai caah a cunglei fimthiam tahnak he aa tlakmi paoh nih sok khawh a si tiah Ngwe-Kyo-Kyar ramleng rian kawltu Agency sin in theih a si.
Hi rian a saktu paoh cu Agency nih alak in cawnpiak (training pek) hna lai i Japan ram i rian va tuan khawhnak zong hi agency lila nih a dihmi vialte an chuahpiak chung hna lai i alak in an thlah hna lai tiah theih a si.
Atu ah training kaimi 97 cu Japan caholh alak in an chimh hna i Agency nih Japan ram i riantuan thlahnak ah a hrampi thlahlawh Japan tangka in 180,000 (Myanmar tangka in sing 25 renglo) an hmuh khawh lai tiah Ngwe-Kyo-Kyar ramleng rian kawltu Agency in Managing Director U Sai See Thu nih a chim.
Atu thlah dingmi riantuantu hna cu kum 5 chung rian an tuan kho lai i an tuandingmi rian cu tar zohkhenh a si lai. Cu pin ah Japan ram i riantuantu thlahnak ah Japan ram i agency hna he pehtlaihnak tuah a si ko nain atu riantuantu thlahnak ahcun riantuantu hna cu rianngeitu he dengteo (direct) in pehtlaihnak tuahpiak an si lai” tiah Managing Director U Sai See Thu nih a biapeh ah a chim.
“Kan ram mino hna hi ramchung ah rian a har ngai cang. Japan caholh thiam a duhtu hna nih an thiam khawhnak ding kanmah nih kan chimh hna. Kumkhat hrawng kan chimh hna i Japan caholh N-4-N-3 tiang thiam kho ding in kan chimh hna.
A niambik N-4 tiang tal an awn hau. Atu hi nikhat ah suimilam 7 in zarhkhat ah ninga chung kan chimh hna. Lamhlat in a rami ngakchia hna cu a tlamtlinnak ding in boarder man zong hnarcheu kan thumh hna. Cun, Japan nih chekmi camipuai cu voikhat tangka kan liampiak lai. Sungh ahcun mah tangka te in phit a hau.
Japan ram ah alak in kan thlah hna lai i Japan ram i rian an ngah hnu cun thlahlawh chung in kan zuk hna lai lo. Zeiruang ah ti ahcun Japan ram leikap in rian ngeitu nih an chuahpiak than hna ding a si caah” tiah Managing Director U Sai See Thu nih a chim.
A duhtu paoh nih Phone- 09401599982 ah pehtlaihnak tuah khawh a si.
Japan ram cu a hrampi riantuantu an har ruang ah Myanmar ram telh in ram 9 in riantuantu hna auh ding timhlamhnak an ngei i Myanmar ram le Japan ram cu hnatlaknak MoC minthutnak an ngei cang. Japan ram ah kal in riantuantu ding hna cu a hrampi thlahlawh hi Japan tangka in 120,000 ngah ahcun license ngeimi agency nih phungningte in thlah khawh a si i a dihmi US$ 2800 a si tiah Myanmar ram cozah nih ri an khiah tiah theih a si.
Credit: Burmese Aisa, The Mirror
About The Author
