Japan Ram Vehvatnak Tlawng Ding Ah Chinram Tanghra Awng Mark Sang Bik 5 An I Tel Ve Lai
City Hunter| 2018 June 18| Myanmar-Japan phu (MJA) tawlrelnak in tukum Myanmar ramchung tanghra awng cathiam bik pawl conglawmhnak ah Japan ram ah vehvatnak khualtlawng ding in (MJA Outstanding Students Award-Japan Exchange Visit) an thlah hna lai. Hi thlah dingmi chung ah Chin ramkulh in tukum tanghra awng mark sang bik minung 5 an i tel ve lai tiah kan theih.
Hi program cu 2016 kum le 2017 kum lio bantuk in tanghra marksang in a awngmi siangngakchia cheukhat, ramleng caholh sianghleirun (Yangon, Mandalay) in Japan caholh a cawngmi siangngakchia cathiam pawl cheukhat thim in ser a si. Japan ram tlawn ding khuallam cu tukum October thla ah an thlah hna lai.
Tukum ah Japan ram ah tlawng ding in thlah dingmi hna cu a tanglei bantuk in an si.
1. 2018 Myanmar ram pumpi huap in mark sang bik hmutu Biology Subject in minung 10 le Economic le art subject in mark sang bik 10, an zapi minung 20 an si lai.
2. Naypyidaw council telh in ramkulh le ramthen kip in mark sang bik a hmutu minung 5 cio in an zapi minung 75 an si lai.
3. Ramdang caholh university (Yangon YUFL le Mandalay MUFL) in Japan caholh a kumthumnak a kaimi chung in thimmi minung 25 cio in an zapi minung 50 an si lai.
Chin ramkulh in mark sang bik a hmutu minung 5 cu a tanglei hna hi an si. Sihmanhsehlaw, anmah pa 5 an kal le kal lo ding fehter an si le si lo fiangte in kan hngal kho rih hna lo.
1. Nu Biak Tin Rem (No.1 BEHS, Hakha) nih mark 500 a hmuh. Distinction 4 a hmuhmi cu; Mathematics, Chemistry, Physics le Biology an si.
2. Pa Min Cung Nung ((No.3 BEHS, Hakha) nih mark 491 a hmu. Distinction 5 a hmuhmi cu; English, Mathematics, Chemistry, Physics le Biology an si.
3. Nu Dawt Tha Par (No.1 BEHS, Hakha) nih mark 483 a hmuh. Distinction 5 a hmuhmi cu; English, Mathematics, Chemistry, Physics le Biology an si.
4. Nu Biak Len Fam (No.3, BEHS-Hakha) nih mark 483 a hmuh. Distinction 4 a hmuhmi cu; Mathematics, Chemistry, Physics le Biology an si.
5. Nu Siang Tin Kai (No.1, BEHS-Hakha) nih mark 481 a hmuh. Distinction 3 a hmuhmi cu; Mathematics, Chemistry le Biology an si.
Myanmar le Japan ramhnih mizapi khat le khat i naihniam, i theihhngalhnak pawl siangngakchia karlakah thanchoternak rian tuanchuahnak ding siseh, hmailei rampi sersiamnak bawmtu ding mifim thiamsang tampi chuah le thanchoternak ding siseh, fimcawnnak in a lamkip thiamnak a ngeimi mino pawl thim i rampi aiawh, nu le pa aiawh le a dangdang dirhmun in i tel le conglawmhnak ding hmuitinh he hi program cu tuah a si.
MJA Outstanding Students Award-Japan Exchange Visit cu 2014 kum in thawk a si. 2018 kum hi avoi 5nak a si cang lai. A cunglei kal ding ah onhmi hna nih soknak form cu Myanmar-Japan phu, Shwe Zabu River View Complex, 23G-1, No.3B, Tower A & C, dotkhatnak, Kanna lam, Alung peng, Yangon ah pehtlaihnak tuah i alak in va laak khawh a si.
A dikthliar in hngalh na duh ahcun Dr. Htay Lwin, Secretary (09262772705) le U Nay Win Htet, zung lutlai (09-421162331) sin ah pehtlaih le hlat khawh a si.
Ref: Edge
Biakilh: Hmanthlak hi anmah pahnih hmanthlak lawng kan ngeih ruang ah anmah te lawng kan taarnak hna hi a si.
About The Author
