June 2 Ah Kawlram Pumpi Tanghra Camipuai Result An Thanhchuah Lai
City Hunter| 2018 May 22| Kawlram pumpi tanghra camipuai sungh/awn result cu June 2 ah kan thanhchuah lai tiah Fimcawnnak Ministry zung in tuanvo ngeitu lutlai pakhat nih a chim. Online- website in Myanmar ram pumpi tanghra camipuai result zohnak link zong kan hun langhter chih.
Tanghra camipuai result cu cacheknak zungkip, pengkip le ramkulh kip fimcawnnak zung kip ah an thanhchuah cio lai. Kawlram chung ramthen le ramkulh zapi tanghra result vialte June 2 ah tar dih a si lai. Cu lawng si lo in Fimcawnnak ministry zung in Myanmar ram cacheknak zung website a simi www.myanmarexam.com ah Kawlram pumpi tanghra camipuai result vialte zoh khawh a si fawn lai tiah 7Day News nih a thanh.
2017 tanghra camipuai cu Myanmar ram pumpi in siangngakchia zapi 716,188 an rak phi i 242,736 an rak awng. A awngmi zatuak hi 33.89% a rak si.
2018 March thla ah tuahmi Myanmar ram pumpi tanghra camipuai a phimi siangngakchia zapi hi 700,000 tluk an si tiah Fimcawnnak Ministry zung cazin ning in theih a si.
2018 March 7 ah thawkmi Myanmar ram pumpi tanghra camipuai ah Chinram in camipuai a phi dingmi zapi hi 11,741 an si. Hi chung ah siangngakchia 1574 nih camipuai an phit lo caah zatuak in tukum Kawlram chung tanghra camipuai phit lo in a bau bik mi cu Chin ramkulh kan si, zatuak in 86.59% lawng camipuai an phi.
March 7 ah thawkmi Myanmar rampi tanghra camipuai a phi dingmi zapi hi 844,358 an si i a nikhatnak camipuai a phimi zapi hi 788,863 lawng an si. Myanmar rampi huap in camipuai phit lo in a baumi zapi hi 55,495 an si tiah Myanmar rampi Fimcawnnak ministry zung in theih a si.
About The Author
