June 2 Ah Tanghra Camipuai Result A Chuak Lai; Online Website Zong In Zoh Khawh A Si Lai
Salai Ngun San Aung| 2018 May 29| Myanmar ram chung dihlak tanghra camipuai result cu June 2, cawnni ruk zing sml. 6 in thanh dih a si cang lai tiah Myanmar rampi fimcawnnak ministry zung nih phungningte in an thanhchuah cang.
Camipuai result cu peng fimcawnnak zung, pengkomh fimcawnnak zung le ramthen le ramkulh fimcawnnak zung kip ah June 2 ah tarlangh a si cang lai.
June 2 ah zingka suimilam 6:00 hn ah Myanmar ram fimcawnnak ministry zung website a simi www.moe.gov.mm ah siseh, Myanmar ram cacheknak zung website a simi www.myanmarexam.org zongah zoh khawh a si lai tiah MOI nih a thanh cang.
2017 tanghra camipuai cu Myanmar ram pumpi in siangngakchia zapi 716,188 an rak phi i 242,736 an rak awng. A awngmi zatuak hi 33.89% a rak si.
2018 March thla ah tuahmi Myanmar ram pumpi tanghra camipuai a phimi siangngakchia zapi hi 700,000 tluk an si tiah Fimcawnnak Ministry zung cazin ning in theih a si.
2018 March 7 ah thawkmi Myanmar ram pumpi tanghra camipuai ah Chinram in camipuai a phi dingmi zapi hi 11,741 an si. Hi chung ah siangngakchia 1574 nih camipuai an phit lo caah zatuak in tukum Kawlram chung tanghra camipuai phit lo in a bau bik mi cu Chin ramkulh kan si, zatuak in 86.59% lawng camipuai an phi.
March 7 ah thawkmi Myanmar rampi tanghra camipuai a phi dingmi zapi hi 844,358 an si i a nikhatnak camipuai a phimi zapi hi 788,863 lawng an si. Myanmar rampi huap in camipuai phit lo in a baumi zapi hi 55,495 an si tiah Myanmar rampi Fimcawnnak ministry zung in theih a si.
Ref: Ministry of Education, Myanmar
About The Author
