Ka Hlaphel Man In Ka Hmuhmi 10% Cu Pumtlamtlinglo Ka Bawmhchanh Hna Lai; P. Thawng Bawi

Salai Cung Cung |2018 November 13| Lai hlasak thiam P. Thawng Bawi @P. Cung Lian Thawng nih November 17, Carson hall ah chun suimilam 12 in 4 tiang avoi 2nak hlaphel (album) aa chuahmi zuarnak le free in hlasanak a tuah lai. Hlaphel man in a hmuhmi zatuak 10% cu pumtlamtlinglo a bawmhchanh (a hlut) hna lai tiah kan theih.

“Tu hi avoi 2nak pumpak hlaphel kaa chuah a si. Hi ka hlaphel chung in tangka ka hmuhmi 10 % hi pumtlamtlinglo mi bawmhnak ka pek hna lai. Ka hlaphel cu keimah tein kaa tawlrel mi asi. Amah belte, hlaphel zuar ni free show caah Mytel le AA Saw company nih sponsor a kan pek. 2019 ah avoi 1nak album Vampire ti mi ka rak i chuah i tu hi avoi 2nak ah “Tuanbia Tialtu Kan Si” timi kan chuah than. Hla ka sak ka tein tu tiang ah hin ka hla phuahmi hi 50 hrawng a si cang. Cun ka sak cangmi hi fung 80 in 100 kar a si cang. Tutan ka hlaphel chungah hin fung 5 hrawng hi cu mipi nih an uar ngai lai ti ka zumh. Honey, Hello, Meng Thong Dan, Ngaihnak Mitthli, tiin keimah he aa rem ning tein ka phuahmi si i zapi nih an uar lai tiah kan ruah. Tutan ka hla pawl cu solo rock tete an si, ngaih nuammi lawng te an si ko” tiah P. Thawng Bawi nih The Chinland Post ah a chim.

“Hmalei ah hin Kawl hla hna ka sak pah cang lai, tu hi kan tuah pah cang. Tu hnu cun kumkhat voikhat asilole kumhnih voikhat in hlaphel chuah khawh kaa zuam cang lai. Tu hi kum 8 hrawng mizapi he i hmu lo in ka umnak sau cang le hmailei ah cun hla zong tampi phuah le sak kaa zuam lai. Hi hlaphel chuahnak caah hin tangka tampi ka dih nain keimah thilri ka hman pah caah tlawmpal aa rel deuh.  Kawlram chung hin cun ka hlaphel man in ka hmu tuk lai lo, ramdang lei ah online store in ka hmuh pah te men lai tiah ka zumh. Cun hi ka hmuhmi chung in 10% hi pumtlamtlinglo mi ka hlut hna lai” tiah P. Thawng Bawi nih TCP ah a chim.

Hi hlaphel chungah hla phuahtu hna cu P.Thawng Bawi, Cung Lian Thang, John LSL, Herh Lian, Lian Uk Thang  an si. Studio hi TnC, Studio D, CMA, Punchy, Ya Eh Nar. Music lei a tum hna cu Guitar Cung Aawng, Bass A Van Drum Bo Tauk, Keyboard Pi Pi le Doron Band, Harmony Khuangtirit an si. Maxing and mastering cu Piang le Aung Do an si nain a tlamtlin deuh lo caah P. Thawng Bawi nih a tuah dih than tiah kan theih.

“November 17 ni free show ah hin album zuarnak kan tuah lai. Cun Angki T-shirt Lucky Draw kan tuah lai. Ka hla a ka cawmi paoh kha hlaphel cungah minthutnak kan tuahpiak hna lai. Cun a karlak ah Hlasak le laam nak a um lai. Tu hi online store zong in kan zuar cang nain a link belte kan hmu kho rih. Online store zong in cawk khawh a si cun ka hlaphel zuarni hrim ah hin a ra mi paoh cu an i chiar lai lo, ni dang he aa lo bak lai lo. Hlasak ka sawmmi Bill Sung zong hlan lio a min a rak thannak hla tha tete, cun keimah le adang hawile zong nih an hla tha mipi uar bik lawngte an sak lai. Rak kan telpi hrim u tiah kan nawl hna, voidang he aa lo lai lo, a nuam khun ko lai” tiah a chim chap.

Hi November 17 free show ni ah hlasatu ding cu; P. Thawng Bawi, Vang Sing Mang, Bill Sung, Biak Tha Cuai an si. Music a tum ding hi anmah P. Thawng Bawi te Maker Band an si tiah kan theih.

Na ruahning rak langhter ve.. (Leave a comment)

%d bloggers like this: